ءومىرزاق شوكەيەۆ تۇركىستان وبلىسىنىڭ ءار اۋدانىنا 1 ميلليارد تەڭگەدەن بولمەك
بۇل قاراجات حالىققا بيىل پايداسى تيەتىن، ناتيجەسى كوزگە كورىنەتىن، جىلدار بويى شەشىمىن تاپپاعان ماسەلەلەردى شەشۋگە جۇمسالۋى كەرەك.
بۇل تۋرالى وبلىستىق ءماسليحاتتىڭ كەزەكتى سەسسياسىندا ايماق باسشىسى ءومىرزاق شوكەيەۆ ايتتى، دەپ حابارلايدى قازاقپارات.
وبلىس اكىمى بۇل باستاما اۋداندارداعى قوردالانعان وزەكتى ماسەلەلەردىڭ شەشىمىن تابۋعا وڭ سەپتىگىن تيگىزەتىنىن ايتادى.
«تۇركىستان وبلىسىنىڭ اۋداندارى مەن ەلدى مەكەندەرىن دامىتۋ بويىنشا جۇمىستار جۇرگىزىلۋى قاجەت. ەلدى مەكەندەردىڭ ماسەلەلەرىن جۇيەلى تۇردە شەشۋىمىز كەرەك. وسىعان وراي، اۋدانداردى قولداۋ ماقساتىندا الداعى ءۇش جىلدا جىل سايىن 1 ميلليارد تەڭگەدەن قارجى بولىنەدى. بۇل قاراجاتتى دۇرىس باعىتتا جۇمساپ، يگەرگەن اۋدانعا كەيىنگى جىلى 2 ميلليارد تەڭگەدەن بەرىلەدى. ال يگەرە الماعان اۋدانداردىڭ قاراجاتى كەرىسىنشە، قىسقارىپ وتىرادى. وسى ارقىلى اۋداندا اتقارىلعان جۇمىس ناتيجەسىن اڭعارۋعا بولادى»، - دەدى ءومىرزاق شوكەيەۆ.
سونداي-اق ءوڭىر باسشىسى وبلىس بيۋجەتىنىڭ كىرىس بولىگىنىڭ تىم ازدىعىن سىنعا الىپ، ونى ەكى ەسەگە ۇلعايتۋ جوسپارلانعانىن اتاپ ءوتتى.
«بيۋجەتتىڭ كىرىس بولىگىنە قاتىستى ايتار بولسام، وبلىس تەك 53 ميلليارد تەڭگە عانا كىرىس تابۋدا. مەنىڭ ويىمشا، وبلىس كىرىسىن 100 ميلليارد تەڭگەگە دەيىن، ياعني 2 ەسەگە ۇلعايتۋعا قابىلەتىمىز جەتەدى. سوندىقتان دا بيۋجەتتىڭ كىرىس بولىگىن ۇلعايتۋ جونىندەگى جۇمىستى جوسپارلى تۇردە جۇرگىزۋ قاجەت. سونداي-اق رەسپۋبليكالىق بيۋجەت قاراجاتى قارالعان وبلىستىڭ كەشەندى دامۋ جوسپارىن قايتا قاراپ شىعۋ كەرەك»، - دەدى ول.
