الماتى وبلىسىنا 1 تريلليون تەڭگەدەن استام ينۆەستيتسيا تارتىلدى
بۇل جونىندە ءوڭىر باسشىسى اماندىق باتالوۆ قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي تالدىقورعاندا وتكەن سالتاناتتى جيىندا ءمالىم ەتتى، - دەپ حابارلايدى قازاقپارات ءتىلشىسى.
وبلىس اكىمى بيىلعى جىلى الماتى وبلىسى مەرەكەنى تولايىم تابىستارمەن قارسى الىپ وتىرعانىن اتاپ ءوتتى. ماسەلەن، 2014-جىلى قانت قىزىلشاسىنىڭ القابى نەبارى 1,2 مىڭ گەكتار بولسا، بيىلعى جىلى ونىڭ كولەمى 11,2 مىڭ گەكتارعا جەتكىزىلىپ، 9,3 ەسەگە، ال ونىمدىلىك 13,8 ەسەگە وسكەن. سونىمەن قاتار وبلىستا قازىرگى كەزدە ءارقايسىنىڭ قۇنى 1 ميلليارد تەڭگەدەن اساتىن 50 ءىرى جوبا جۇزەگە اسىرىلۋدا. سونىڭ 30 ى - شەتەلدىك ينۆەستورلاردىڭ، ونىڭ ىشىندە 9 ى - ترانسۇلتتىق كومپانيالاردىڭ قاتىسۋىمەن ىسكە اسىرىلۋدا. جالپى شەتەلدىك ينۆەستورلاردىڭ قولداۋىمەن قولعا الىنعان 30 جوبانىڭ ارقاسىندا 1 تريلليون تەڭگەدەن استام ينۆەستيتسيا تارتىلدى.
«مەملەكەت باسشىسىنىڭ قولداۋىمەن قول جەتكىزىلگەن وسى ناتيجەلەردىڭ بارلىعى - بىرلەسكەن جۇمىستىڭ ناتيجەسى. بۇگىنگى مەرەكەنى پايدالانىپ، بارشا جەتىسۋلىقتارعا ريزاشىلىعىمدى بىلدىرەمىن. الدا ءالى تالاي جوسپارلار بار. ەلباسىنىڭ جولداۋلارىندا جانە باعدارلامالىق ماقالالارىندا ايتىلعان ستراتەگيالىق ماڭىزدى مىندەتتەرىن جۇزەگە اسىرۋ جولىندا ىنتىماقپەن ەڭبەك ەتەمىز دەپ سەنەمىن»، - دەدى ا. باتالوۆ.
سالتاناتتى كەش بارىسىندا قاراساي اۋداندىق اقساقالدار القاسىنىڭ ءتوراعاسى، ەلباسىنىڭ سىنىپتاسى سايلاۋبەك قىدىراليەۆ ءسوز الدى. ارداگەر ءوز سوزىندە مەملەكەت باسشىسىنىڭ بالا كۇنىنەن بايقالعان ەرەكشە دارىنىنا توقتالىپ، ەستەلىكتەر ايتىپ بەردى. ءوزىنىڭ بالالىق شاعى مەن بۇگىنگى بەيبىت تە بەرەكەلى زاماندى سالىستىرا اڭگىمەلەپ، ەلگە بەرەكە-بىرلىك، ەلباسىنا مىقتى دەنساۋلىق تىلەپ، كوپشىلىكتى تۇڭعىش پرەزيدەنت كۇنىمەن قۇتتىقتادى.
«ولكە تىنىسى» ج ش س باس ديرەكتورى مەيرام ءجانادىلوۆ تە قۇتتىقتاۋ تىلەگىن ايتىپ، رەسپۋبليكالىق تەلەارنالاردا جۇمىس ىستەگەن شاقتارىندا ەلباسىمەن بىرگە جۇرگەن ساپارلارىنان ەستەلىكتەر ايتتى. سول سياقتى ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى قۋات بايمىرزايەۆ، اقسۋ اۋدانىنداعى اقىن سارا اتىنداعى جاستار مادەني ورتالىعىنىڭ ديرەكتورى فاريزا انۆارتۋرە قىزى دا قۇتتىقتاۋ تىلەكتەرىن جەتكىزدى.
شارا مەملەكەتتىك قىزمەتكە جاڭادان جۇمىسقا تۇرعان 7 جاس ماماننىڭ سالتاناتتى تۇردە انت قابىلداۋ راسىمىمەن جالعاستى. وسى جيىندا ا. باتالوۆ «استانانىڭ 20 جىلدىعى» مەرەيتويلىق مەدالىمەن وبلىستىڭ ءبىرقاتار ازاماتتارىن ماراپاتتادى.