الماتى وبلىسىندا قاراقۇيرىق اتقاندار 1 ميلليون تەڭگەدەن ايىپپۇل تولەۋى مۇمكىن

تالدىقورعان. قازاقپارات - الماتى وبلىسىنىڭ اۋماعىندا « قىزىل كىتاپقا» ەنگەن قاراقۇيرىقتى اتتى دەگەن كۇدىكپەن ۇيعىر جانە پانفيلوۆ اۋداندارىنىڭ ەكى تۇرعىنى ۇستالدى.

 براكونەرلەردىڭ ءار قايسىسىنا 400 اەك ياعني، 1 ميلليون تەڭگەگە جۋىق ايىپپۇل سالىنۋى مۇمكىن، - دەپ حابارلايدى قازاقپارات ءتىلشىسى.

تابيعاتتى قورعاۋ ۆەدومستۆولارىمەن بىرلەسكەن رەيد بارىسىندا 31 - قازاندا پوليتسەيلەر ۇيعىر اۋدانى اۋماعىندا اتۋعا قاتاڭ تىيىم سالىنعان قاراقۇيرىقتى ولجالاعان براكونەردى قولعا تۇسىرگەن. زاڭسىز اڭشىلىق جاساعان ازاماتتان اڭ ەتى، «تيگر» ويىق مىلتىعى، اڭشى مىلتىعى جانە وق- دارىلەر تاركىلەنگەن.

«الماتى وبلىسىنىڭ اۋماعىندا « قىزىل كىتاپقا» ەنگەن قاراقۇيرىقتى اتقانى ءۇشىن ۇيعىر اۋدانىنىڭ 53 جاستاعى تۇرعىنىنا قاتىستى قىلمىستىق كودەكستىڭ 337-بابى، 4-تارماعىنا سايكەس سوتقا دەيىنگى تەرگەۋ امالدارى جۇرگىزىلىپ جاتىر»، - دەپ مالىمدەدى الماتى وبلىستىق پوليتسيا دەپارتامەنتىنىڭ باسپا ءسوز قىزمەتى.

ۆەدومستۆو تاراتقان اقپاراتقا سايكەس، زاڭسىز اڭشىلىقپەن كۇرەستى كۇشەيتۋگە ارنالعان ەكىنشى فاكتى پانفيلوۆ اۋدانىنىڭ ماڭىندا تىركەلگەن. ول جەردە 54 جاستاعى ازامات باسقارعان «ۋاز» اۆتوكولىگىن تەكسەرۋ بارىسىندا قاراقۇيرىق ەتى مەن «موسكينا» ويىق مىلتىعى، سونداي- اق وزگە اڭشى مىلتىعى جانە وق- دارىلەر تابىلدى. اتالعان ازاماتقا قاتىستى سوتقا دەيىنگى تەرگەۋ امالدارى جۇرگىزىلۋدە.

الماتى وبلىستىق پوليتسيا دەپارتامەنتىنىڭ باسپا ءسوز قىزمەتى قاراقۇيرىقتى اتقانى ءۇشىن زاڭعا سايكەس براكونەرلەردەن مەملەكەت پايداسىنا 400 ا ە ك مولشەرىندە ماتەريالدىق شىعىن ءوندىرىلۋى ءتيىس ەكەنىن ەسكە سالادى.

 وسىعان دەيىن الماتى وبلىسىندا قىزىل كىتاپقا ەنگەن قاراقۇيرىقتاردى اتقان براكونەرلەردىڭ قولعا تۇسكەندىگى تۋرالى جازعانبىز.

اۆتور: سامال قابىشيەۆا