قاراشىعاناقتاعى شەتەلدىك كومپانيالار قازاقستانعا 1 ميلليارد دوللار وتەماقى تولەيدى
«ق ر ەنەرگەتيكا مينيسترلىگى، ق ر قارجى مينيسترلىگى مەن ۋاكىلەتتى ورگان - «PSA» ج ش س اتىنان قازاقستان رەسپۋبليكاسىنىڭ ۇكىمەتى مەن قاراشىعاناق جوباسىنىڭ اكسيونەرلەرى - ەني، شەلل، شيەۆرون، لۋكويل جانە قازمۇنايگاز (كونسورتسيۋم) شىنايىلىق يندەكسى بويىنشا پىكىرتالاسقا نۇكتە قويىپ، ناقتى ءبىر مامىلەگە كەلدى. تاراپتار كەلىسپەۋشىلىكتى رەتتەۋدىڭ نەگىزگى شارتتارىن قامتيتىن قاعيداتتار تۋرالى كەلىسىمگە قول جەتكىزدى»، - دەلىنگەن حابارلامادا.
بەلگىلى بولىپ وتىرعانداي، قازاقستان مەن كونسورتسيۋمنىڭ اراسىندا كىرىستى ءونىمدى بولۋدە تاراپتاردىڭ ۇلەسى كالكۋلياتسياسىنىڭ ادىستەمەسى بويىنشا كەلىسپەۋشىلىك تۋىنداعان. وسىعان بايلانىستى قاراشىعاناق جوباسىنىڭ ءونىمدى ءبولۋ تۋرالى سوڭعى ءارى ناقتى شەشىمىنىڭ شارتتارىنا سايكەس، رەسپۋبليكا ءوزىنىڭ قۇقىعىن قورعاۋ ءۇشىن حالىقارالىق اربيتراجقا جۇگىنگەن ەدى.
«الايدا كوپ جىلعى ىنتىماقتاستىقتى ەسكەرە كەلە، تاراپتار كەلىسسوز جۇرگىزۋ بارىسىندا داۋدى دۇرىس رەتتەۋدىڭ ءوزارا ءتيىمدى جولىن تاپتى. وسىلايشا، تاراپتار داۋدى رەتتەۋدىڭ نەگىزگى شارتتارىن قامتيتىن قاعيداتتار تۋرالى كەلىسىمگە قول قويدى»، - دەلىنگەن حابارلامادا.
ياعني، بىرىنشىدەن كونسورتسيۋم رەسپۋبليكاعا 1,111 ميلليارد ا ق ش دوللارى مولشەرىندە اقشالاي وتەماقى تولەيدى. ەكىنشىدەن، ءونىمدى ءبولۋ مەحانيزمىنە وزگەرىستەر ەنگىزىلەدى. ەنەرگەتيكا مينيسترلىگىنىڭ مالىمەتىنە سۇيەنسەك، بۇل وزگەرىستەر مۇناي باعاسى باررەلىنە 80 ا ق ش دوللارلىق مولشەردى ساقتاپ تۇرعان جاعدايدا 2037 -جىلعا دەيىن رەسپۋبليكاعا جوبا ەسەبىنەن قوسىمشا 415 ميلليون دوللار اكەلىپ تۇرادى. ۇشىنشىدەن، كونتسورتسيۋم ينفراقۇرىلىمدىق جوبا قۇرىلىسى ءۇشىن رەسپۋبليكاعا 10 جىل مەرزىمگە زايم بەرەدى، بولماسا (باس تارتقان جاعدايدا) قۇنى 200 ميلليون ا ق ش دوللارلىق زايمنىڭ ەكۆيۆالەنتتى باعاسىن تولەپ بەرەدى.
«وسىلايشا، اتالمىش داۋدى رەتتەۋدىڭ بىرىكتىرىلگەن اقشالاي قۇندىلىعى رەسپۋبليكا ەسەبىنە 1,7 ميلليارد ا ق ش دوللارىن اكەلەدى. جۋىق ارادا اتالمىش سومانىڭ 1,3 ميلليارد دوللارى مەملەكەتكە اۋدارىلاتىن بولادى. مامىلەگە قوسىمشا رەتىندە ۇكىمەت قاراشىعاناق ينۆەس جوبالارىنىڭ دامۋى ءۇشىن كونسورتسيۋم مىندەتتەمەلەر الاتىنداي كەلىسىمگە قول جەتكىزىپ وتىر»، - دەلىنگەن ەنەرگتەتيكا مينيسترلىگىنىڭ حابارلاماسىندا.
اۆتور: ايان بەكەن ۇلى
