بيۋدجەتتىك سالا قىزمەتكەرلەرىنە 1 ميلليون تەڭگەنىڭ تۇرعىن ءۇي كۋالىكتەرى بەرىلەدى

استانا. قازاقپارات - استانا اكىمدىگى مۇعالىمدەر، دارىگەرلەر جانە تاعى باسقا بيۋدجەتتىك سالا قىزمەتكەرلەرىنىڭ باسپانا ماسەلەسىنە شەشۋگە ارنالعان تىڭ جوبانى قولعا الماقشى.

 ونىڭ اياسىندا ۇزدىك ماماندارعا 1 ميلليون تەڭگە كولەمىندە تۇرعىن ءۇي كۋالىكتەرى بەرىلەدى. اتالعان اقشا بانككە العاشقى جارنا رەتىندە اۋدارىلادى، دەپ حابارلايدى قازاقپارات ءتىلشىسى.

قالا اكىمى اسەت يسەكەشيەۆتىڭ ايتۋىنشا، قازىرگى كەزدە ءبىز قالا قىزمەتكەرلەرىنە ارنالعان جاڭا تۇرعىن ءۇي باعدارلاماسىن ازىرلەپ جاتىر.

«ونى تۇرعىن ءۇي قۇرىلىس جيناق بانكى ارقىلى ىسكە اسىراتىن بولامىز. تۇرعىن ءۇي كۋالىكتەرى ارقىلى ءبىز مۇعالىمدەر، دارىگەرلەر جانە تاعى باسقا مامانداردىڭ باسپانا ماسەلەسىن شەشۋدى كوزدەيمىز»، - دەدى ءا. يسەكەشيەۆ «استانا- ادالدىق الاڭى» جوباسى اياسىندا وتكەن جيىندا.

اكىمدىكتىڭ باسپا ءسوز حاتشىسى ەلۆيرا جۇرگەنبايەۆا اتالعان باستامانىڭ ءمان- ماڭىزىن كەڭىنەن ءتۇسىندىرىپ بەردى.

ونىڭ سوزىنە قاراعاندا، ۇزدىك ماماندارعا 1 ميلليون تەڭگە كولەمىندە تۇرعىن ءۇي كۋالىكتەرى بەرىلەدى. ول اقشا ادامنىڭ تۇرعىن ءۇي قۇرىلىس جيناق بانكىدەگى جەكە ەسەپ شوتىنا اۋدارىلادى. «ميلليون تەڭگەنى اكىمدىك كومەك رەتىندە بەرەدى. ونى العاشقى جارنا رەتىندە پايدالانۋ قاجەت. اقشانىڭ يەسى ارى قاراي ءوزى قوسادى. ماسەلەن، باستاپقى جارنا 3,5 ميلليون تەڭگە بولسا، ءبىر ميلليونىن اكىمدىك بەرەدى، قالعان اقشانى ادام ءوزى جينايدى. سونىڭ ارقاسىندا ءۇيدى ەرتەرەك الۋعا مۇمكىندىك بار. ارينە، ول مۇعالىمدەرگە دە ستيمۋل بولادى. باستى تالاپ - جاقسى كورسەتكىشتەر، تاجىريبە مەن وقۋشىلاردىڭ جەتىستىكتەرى»، - دەدى ە. جۇرگەنبايەۆا قازاقپارات تىلشىسىنە بەرگەن سۇحباتىندا.

ايتا كەتەيىك، استاناداعى تامىز كونفەرەنسياسىندا اسەت يسەكەشيەۆ بيۋدجەتتىك سالا قىزمەتكەرلەرىنىڭ ەليتالىق كورپۋسىن جاساقتايتىنىن مالىمدەگەن بولاتىن.

«بۇگىندە قالا اكىمدىگى مىقتى مامانداردى تارتىپ، ولارعا جاعداي جاساۋ جاعىن ويلاستىرىپ كەلەدى. سوڭعى ون جىلدىڭ ىشىندە مەملەكەتتىك باعدارلاما اياسىندا استانالىق مۇعالىمدەرگە  2500-دەن استام پاتەر بەرىلدى. دەگەنمەن، قالا ءوسىپ كەلەدى. ەندى، بىزگە بارلىق سالالار بويىنشا مىقتى مامانداردىڭ كورپۋسىن قالىپتاستىرۋ قاجەت. ولاردىڭ ىشىندە مۇعالىمدەر، پوليتسەيلەر، دارىگەرلەر، ءورت سوندىرۋشىلەر جانە تاعى باسقا ماماندار بار. قازىر مەملەكەت باسشىسىنىڭ باستاماسىمەن «7-20-25» باعدارلاماسىنىڭ قولعا الىنعانىن ءبارىمىز جاقسى بىلەمىز. كاسىبي ماماندار كورپۋسىن قولداۋ ماقساتىندا ءبىز وسى ساناتتاعى قىزمەتكەرلەردى باسپانامەن قامتۋ تەتىكتەرىن ازىرلەيمىز. ءسويتىپ، تۇرعىن ءۇي قۇرىلىس جيناق بانكىمەن بىرگە بيۋدجەتتىك سالانىڭ 10 مىڭ قىزمەتكەرىن پاتەرمەن قامتاماسىز ەتەمىز. سونىڭ ىشىندە 3 مىڭداي پاتەر مۇعالىمدەرگە تاراتىلادى»، - دەپ اتاپ كورسەتتى ءا. يسەكەشيەۆ.

اۆتور: ارمان اسقاروۆ