سەمەيدە سالماعى 1 تونناعا جۋىق كولىكتەردى كوتەرەتىن ازامات تۇرادى
زاكير 1994-جىلى 18- ناۋرىزدا سەمەي قالاسىندا دۇنيەگە كەلگەن. 11 جاسىندا العاش رەت اكەسى شىمىر دەنەلى ازامات بولىپ ءوسسىن دەپ جاتتىقتىرۋ زالىنا اكەلگەن ەكەن. سودان بەرى سپورتتان قول ۇزگەن ەمەس. ال پاۋەرليفتينگپەن كاسىبي تۇردە اينالىسۋدى 16 جاسىندا باستاعان.
«العاش رەت 16 جاسىمدا قالالىق چەمپيوناتتا باق سىنادىم. جارىسقا مەنىمەن شامالاس جۇزدەگەن پاۋەرليفتەر جينالدى. ءبىراق قارسىلاستارىمنان باسىم ءتۇسىپ، ەكىنشى ورىن الدىم. شالقالاپ جاتىپ جالپى سالماعى 225 كەلى بولاتىن ءزىل تەمىردى كوتەردىم»، - دەيدى زاكير.
العاشقى جەڭىسى زاكيردىڭ پاۋەرليفتينگ سپورتىنا دەگەن قىزىعۋشىلىعىن ودان سايىن ارتتىرعان. 17 جاسىندا قازاقستان چەمپيوناتىنا قاتىسىپ، 175 كەلىنى كوتەرىپ، ەكىنشى ورىنعا يە بولسا، 2012-جىلعى ازيا چەمپيوناتىندا باق سىناپ، تاعى جۇلدەگەرلەر قاتارىنان كورىندى. ال 2015-جىلى الەم چەمپيوناتىندا 225 كەلىنى كوتەرىپ، 2- ورىن الدى. بۇگىنگى كۇنى ول شالقالاپ جاتىپ 250 كەلىنى كوتەرەتەتىن قازاقستانداعى رەكوردشىنىڭ ءبىرى.
«العا قويعان ماقساتىم كوپ نەگىزى. سولاردىڭ ءبىرى بوزكىلەمدە بەلدەسۋ. ياعني، قازىر قازاق كۇرەسىن قولعا الدىم. الداعى ۋاقىتتا وسى سپورت تۇرىنەن جارىستارعا قاتىسقىم كەلەدى. كۇنىمنىڭ تەڭ جارتىسى جاتتىعۋ زالىندا وتەدى»، - دەدى سپورتشى.
سونىمەن قاتار زاكير سوڭعى كەزدەرى سالماعى 1 توننا بولاتىن اۆتوكولىكتەردى كوتەرىپ، تانىلىپ جۇرگەندەردىڭ ءبىرى. سپورتشى اۆتوموبيلدى كوتەرۋدى كوپتەن ارمانداعانىن ايتادى. ول ءۇشىن اۋىر سالماقتى كوتەرۋ قالىپتى جاعداي بولعانمەن كولىكتى كوتەرۋگە كەلگەندە ىشتەي ءبىراز ۋاقىت دايىندالعانىن جەتكىزدى.
«اۋىر سالماقتى شتانگىلەردى كوتەرىپ جۇرگەندىكتەن كۇشىمدى كورسەتەتىن ودان دا اۋىر سالماقتى كوتەرۋگە تىرىسۋدىڭ ۋاقىتى كەلدى دەپ شەشتىم. سوندىقتان سوڭعى كەزدە ءتۇرلى كولىكتەردى كوتەرىپ ءجۇرمىن. بۇل دا ماعان العا ۇمتىلۋعا كۇش-جىگەر بەرەدى دەسەم بولادى. جانە بۇل جاستاردىڭ قىزىعۋشىلىعىن ارتتىرۋدا. ولارعا قولىمنان كەلگەنشە اقىل-كەڭەس بەرىپ، ءوز بىلگەنىمدى ايتىپ جۇرەمىن».
سونىمەن قاتار زاكير قارا كۇشىن ءتۇرلى ادىستەرمەن دالەلدەپ ءجۇر. مىسالى، ول ءبىر قولىمەن سالماعى 80 كەلى ازاماتتى جانە 16 كەلىلىك گىر تاسىن، ەكىنشى قولىمەن ەكىنشى 16 كەلىلىك گىر تاسىن ءبىر مەزەتتە كوتەرەدى.
جاس سپورتشىنىڭ ماقساتى - ەلىمىزدە پاۋەرليفتينگ سپورتىنىڭ دامۋىنا ۇلەس قوسىپ، وزىندىك قولتاڭباسىن قالدىرۋ.
