اقتوبەدە اكىم ەسەبىنە بارعان 1- توپتاعى مۇگەدەك ساپاربايەۆتان باتا سۇرادى
اقتوبە قالاسىنىڭ تۇرعىنى الىبەك ەلەۋسىزوۆ كەشە قالا اكىمى ءىلياس يسپانوۆتىڭ ەسەپ بەرۋ كەزدەسۋىنە باردى. ەكى اياعى جوق، ەكى قولى مۇلدە جۇمىس ىستەمەيتىن مۇمكىندىگى شەكتەۋلى جان «جۇرەكتەن جۇرەككە» ەرىكتىلەر توبىندا جۇرگەنىن، قايىرىمدى جاندارمەن بىرگە جەتىم بالالارعا، اتا-انانىڭ قامقورلىعىنسىز قالعان سابيلەر مەن باسىنا ءىس تۇسكەن ادامدارعا كومەكتەسۋگە ۇلەس قوساتىنىن ايتتى.
جاستار مەن قايىرىمدى جانداردىڭ بۇل توبى اقتوبەلىكتەر ءۇشىن جاقسى تانىس. ءبىر جىل بويى اتقارعان ءىستى تىزبەكتەگەن 1- توپ مۇگەدەگى الىبەك ەلەۋسىزوۆ جەرگىلىكتى كاسىپكەرلەرگە، مەملەكەتتىك مەكەمە قىزمەتكەرلەرىنە العىسىن ايتىپ، وبلىس اكىمى بەردىبەك ساپاربايەۆتان باتا سۇرادى.
«بارلىق ادامنىڭ ون ەكى مۇشەسى ساۋ بولا بەرمەيدى. اللانىڭ بەرگەنىنە ەشكىم قارسى تۇرا المايدى. ءبىراق ومىرگە كەلگەن سوڭ ءومىر سۇرۋگە دەگەن تالپىنىس بولۋى كەرەك. ون ەكى مۇشەم ساۋ ادام «مەن نەگە تاڭەرتەڭنەن كەشكە دەيىن جىلاي بەرەمىن» دەپ ويلانۋى كەرەك. «ۇكىمەت، جەرلەستەرىم، اعايىن-دوستارىم نەگە كومەكتەسپەيدى» دەپ وكپەلەيتىندەر وسى ادامدارعا قاراپ ويلانسا دەيمىز. ءبىز شامامىز كەلگەنشە مۇمكىندىگى شەكتەۋلى جاندارعا كومەكتەسەمىز، قولدايمىز. مۇمكىندىك بولسا، مەملەكەتتىك ماراپاتتاردى الىپ بەرەمىز. ەلىمىزدە جۇرەگى كەڭ، جانىنداعى جەرلەستەرىنە قالاي كومەكتەسەمىن دەگەن ادامدار كوپ بولسا، قازاق، قازاقستان جامان بولمايدى. ساعان دەنساۋلىق بەرسىن! بويىڭداعى قايراتىڭ، جىگەرىڭ كەتپەسىن. جان-جاعىڭدا جۇرەگى كەڭ ازاماتتار كوپ بولسىن!» - دەدى وبلىس اكىمى بەردىبەك ساپاربايەۆ.
ايتا كەتەيىك، وڭىردە اقتوبەلىك جاستاردىڭ باسىن بىرىكتىرگەن «جۇرەكتەن جۇرەككە» قايىرىمدىلىق توبى بار. ولار ءۇش جىلدان بەرى جەتىم بالالارعا، الەۋمەتتىك جاعدايى تومەن وتباسىلارعا كومەكتەستىپ كەلەدى. ءتىپتى، مۇگەدەكتەر اراسىندا سپورتتىق شارانى ءجيى ۇيىمداستىرادى.
