ەرلان ءبىلال 1 ميلليوننان اساتىن تەڭگە كولەمىندە كەپىلدەمە تولەدى

الماتى. قازاقپارات - الماتىدا مەدەۋ اۋداندىق سوتى پارا الدى دەگەن كۇدىكپەن ۇستالعان تەاتر ديرەكتورى ەرلان ءبىلالعا قاتىستى بۇلتارتپاۋ شاراسىن سانكسيالادى.

ول 1205000 تەڭگە كولەمىندە كەپىلدەمە تولەدى، دەپ حابارلايدى قازاقپارات ءتىلشىسى.

قالالىق سوتتىڭ باسپا ءسوز قىزمەتىنىڭ حابارلاۋىنشا، 9- قاڭتاردا 2№ مەدەۋ اۋداندىق تەرگەۋ سوتى «قازاق مەملەكەتتىك اكادەميالىق دراما تەاترى» ر م ك ديرەكتورى ەرلان ءبىلالدى كەپىلمەن بوساتۋ تۇرىندەگى بۇلتارتپاۋ شاراسىن قابىلدادى.

كۇدىكتىنى كەپىلمەن بوساتۋ سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ الماتى بويىنشا دەپارتامەنتىنىڭ ارىزىنا ساي قابىلداندى.

سوتقا دەيىنگى تەرگەۋ ءىسى ماتەريالدارىنا سايكەس، ە. ءبىلال «سەزام» قوعامدىق قايىرىمدىلىق قورىنىڭ باسشىسىنان 23- جەلتوقسان مەن 7- قاڭتار ارالىعىندا تەاتر قويىلىمدارىن بىرىگىپ وتكىزۋ تۋرالى كەلىسىمشارت جاساۋ ءۇشىن 900 مىڭ تەڭگە كولەمىندە پارا العان.

ايتا كەتۋ كەرەك، بەلگىلى اكتەر، تەاتر قايراتكەرى ەرلان ءبىلال تەاتر عيماراتىندا زاڭدى تۇلعادان 1 ميلليون تەڭگەگە جۋىق كولەمىندە پارا الىپ جاتقان جەرىنەن ۇستالعان بولاتىن.

كەيىن قازاقستان تەاتر قاۋىمداستىعى، اكتەرلەر، بەلگىلى ونەر قايراتكەرلەرى ەرلاندى اراشالاپ الماق بولدى.

اۆتور: گۇلميرا عوسمانالي