روزا رىمبايەۆا ءوزى وقىعان مەكتەپكە 1 ميلليون تەڭگە اۋداردى

استانا. قازاقپارات - قازاقستاننىڭ حالىق ءارتىسى، بەلگىلى ءانشى روزا رىمبايەۆا «رۋحاني جاڭعىرۋ» باعدارلاماسى اياسىندا شىعىس قازاقستاندا باستاۋ العان «مەنىڭ مەكتەبىم» جوباسىنا وزىندىك ءۇنىن قوستى.

اتاقتى ءانشى ءوزى وقىعان مەكتەبىنە 1 ميلليون تەڭگە اۋداردى، دەپ حابارلايدى «قازاقپارات» ح ا ا ءتىلشىسى.

ەسكە سالا كەتەيىك، كەشە وسكەمەن قالاسىندا شىعىس قازاقستان وبلىسىنىڭ بارلىق كاسىپكەرلەرى باس قوسقان «تۋعان جەر» اتتى اۋقىمدى فورۋم بولىپ وتكەن بولاتىن. ايماق باسشىسى دانيال احمەتوۆ شارا بارىسىندا شىعىس قازاقستاننىڭ كاسىپكەرلەرى ءوڭىردىڭ دامۋىنا زور ۇلەستەرىن قوسىپ، «رۋحاني جاڭعىرۋ» باعدارلاماسى اياسىندا «مەنىڭ مەكتەبىم» اتتى جوباعا بەلسەنە اتسالىسقانىن تىلگە تيەك ەتتى.

دانيال احمەتوۆتىڭ ايتۋىنشا، وسى جوبا ارقىلى ايماقتاعى بارلىق مەكتەپتى زاماننىڭ وزىق بيولوگيا، حيميا، فيزيكا جانە روبوتوتەحنيكا كابينەتتەرىمەن جابدىقتاۋ كوزدەلگەن.

«وڭىردەگى بارلىق ءبىلىم وردالارى نازاربايەۆ زياتكەرلىك مەكتەبىنەن كەم بولماۋى كەرەك»، - دەيدى ايماق باسشىسى.

كاسىپكەرلەر ايماق باسشىسىنىڭ باستاماسىنا قولداۋ ءبىلدىرىپ وتىر. ولارمەن بىرگە يگى جوباعا ءانشى روزا رىمبايەۆا دا ءۇن قوسىپ، ءوزى تۇلەپ ۇشقان ءبىلىم ورداسىنا 1 ميلليون تەڭگە اۋداردى. كاسىپكەرلەر مەن تانىمال تۇلعالار تاراپىنان جينالعان قاراجات «پارىز» اتتى وبلىستىق قورعا اۋدارىلىپ، سول قوردان وڭىردەگى مەكتەپتەرگە باعىتتالماق.

ايتا كەتەرلىگى بۇگىنگى كۇنگە دەيىن «مەنىڭ مەكتەبىم» جوباسىنا 2 ميلليارد 300 ميلليون تەڭگە جينالعان.