قازاقستان 1 ميلليارد دوللار ءدارى- دارمەكتى سىرتتان ساتىپ الادى - نۇرسۇلتان نازاربايەۆ

استانا. قازاقپارات - بۇگىن قازاقستان - پولشا بيزنەس فورۋمىنا قاتىسقان مەملەكەت باسشىسى نۇرسۇلتان نازاربايەۆ فارماتسيەۆتيكالىق سالانى دامىتۋ ماسەلەسىنە باسا نازار اۋداردى.

 وتىرىسقا قازاقستانعا مەملەكەتتىك ساپارمەن كەلگەن پولشا پرەزيدەنتى اندجەي دۋدا دا قاتىستى، دەپ حابارلايدى قازاقپارات ءتىلشىسى.

 ءوز سوزىندە نۇرسۇلتان نازاربايەۆ فارماتسيەۆتيكا سالاسىنداعى پولياك كومپانيالارىنىڭ تابىستى ەڭبەگىنە توقتالىپ: «قازىرگى كەزدە قازاقستان سىرتتان ءدارى- دارمەكتەردى 1 ميلليارد دوللارعا يمپورتتايدى. سول سەبەپتى ءوز جەرىمىزدە زاۋىت پەن فابريكالاردى سالۋ اسا قاجەت. ول ءۇشىن ءبىز بارلىق جاعدايلاردى جاساۋعا دايىنبىز»، - دەپ اتاپ كورسەتتى نۇرسۇلتان نازاربايەۆ.

ايتا كەتكەن ءجون، بۇگىندە قازاقستان نارىعىندا «PolPharma» اتتى پولياك كومپانياسى جۇمىس ىستەيدى. شىمكەنت قالاسىندا ونىڭ فارماتسيەۆتيكالىق زاۋىتى دا بار.

جالپى پولشانىڭ ورتالىق ازيا ەلدەرىمەن جاساعان جالپى تاۋار اينالىمىنىڭ 80 پايىزى قازاقستانمەن اراداعى الىس- بەرىسكە تيەسىلى. سوڭعى ون جىلدىڭ ىشىندە اتالعان مەملەكەتتەن كەلگەن ينۆەستيتسيالاردىڭ جالپى كولەمى 200 ميلليون دوللاردى قۇرادى. ال ەكى جاقتى تاۋار اينالىمى 783 ميلليون دوللارعا جەتتى.

اۆتور: ارمان اسقاروۆ