پاۆلوداردا مەملەكەتتىك مەكەمەلەر ەسكى ۇلگىدەگى ەلتاڭبالاردى 1 اي ىشىندە اۋىستىرۋى ءتيىس
بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز كونفەرەنسياسىندا ق ر ي د م تەحنيكالىق رەتتەۋ جانە مەترولوگيا كوميتەتى پاۆلودار وبلىسى بويىنشا دەپارتامەنتىنىڭ باسشىسى ايبەك الىبايەۆ ءمالىم ەتتى.
«قازىرگى تاڭدا ۇلتتىق ستاندارتتارعا سايكەس مەملەكەتتىك رامىزدەردى شىعارۋ مەن ولاردى پايدالانۋ ەڭ ماڭىزدى ماسەلەلەردىڭ ءبىرى بولىپ تابىلادى»، - دەيدى ايبەك الىبايەۆ.
ق ر يندۋستريا جانە جاڭا تەحنولوگيالار مينيسترلىگى 2014-جىلدىڭ مامىرىندا ق ر س ت 989- 2014 «قازاقستان رەسپۋبليكاسىنىڭ مەملەكەتتىك ەلتاڭباسى. تەحنيكالىق شارتتار» ۇلتتىق ستاندارتىن بەكىتتى. جاڭا ستاندارتقا سايكەس ەلتاڭبا بەدەرىندەگى ءاربىر بولشەكتىڭ اتاۋى مەن ولشەمى ناقتىلاندى. بىرتەكتى باقىلاۋ ءتارتىبى ەنگىزىلدى. تاعى ءبىر ەرەكشەلىگى - 3D نۇسقاسى.
بۇل بارلىق ولشەمدەرىن ءدال شىعارىپ بەرەدى. سپيكەردىڭ ايتۋىنشا، دەپارتامەنت 2015-جىلدان بەرى وبلىستىق ىشكى ساياسات باسقارماسى بىرگە بارلىق مەملەكەتتىك مەكەمەلەردى ارالاپ، اۋداندار مەن قالالاردىڭ اكىمدەرىنە وسى ماسەلەگە قاتىستى حات جولداعان. بۇدان كەيىن بارلىق مەملەكەتتىك مەكەمەلەر، اكىمدىكتەر بيۋدجەتكە قاراجات جوسپارلاۋى ءتيىس بولعان.
بۇگىنگى تاڭدا كوپتەگەن ۇيىمدار مەن مەكەمەلەر جاڭا ستاندارتقا ساي ەلتاڭبالارىن اۋىستىرعان.
«2017-جىلدىڭ باسىنان قالاداعى جانە شارباقتى اۋدانىندا مەملەكەتتىك رامىزدەرگە جۇرگىزىلگەن مونيتورينگ ناتيجەسىندە 80 مەكەمە تەكسەرىلىپ، ورەسكەل بۇزۋشىلىقتار انىقتالمادى. مەملەكەتتىك تۋلار مەن ەلتاڭبالاردى ساتىپ الۋعا ليتسەنزياسى بار كاسىپورىندار عانا مەملەكەتتىك ساتىپ الۋ ارقىلى قاتىسا الادى. پاۆلودار وبلىسىندا مۇنداي قىزمەت تۇرىمەن «اسەل جارناما» ج ك اينالىسادى. ۇلتتىق ستاندارتتار ساقتالماعان جاعدايدا ايىپپۇل سالىنادى»، - دەيدى ايبەك الىبايەۆ.