قازاقستان- وزبەكستان بيزنەس فورۋمىندا 1 ميلليارد دوللاردىڭ كەلىسىمشارتىنا قول قويىلادى
بۇل تۋرالى بۇگىن اقوردادا وزبەكستان پرەزيدەنتى شاۆكات ميرزيەيەۆپەن ءوتىپ جاتقان ەكىجاقتى كەزدەسۋ بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.
«ءبىز كەلىسسوزدەردى كەشە باستاپ كەتىپ، كولىك پەن ساۋدا ءۇشىن ءوزارا شەكارالاردى اشۋ باعىتىندا اتقارىلعان جۇمىستاردى ايتتىق. بۇل ءبىزدىڭ ەلدەرىمىزدىڭ اراسىنداعى ساۋدانىڭ كۇرت وسۋىنە تۇرتكى بولدى، ءونىمنىڭ جاڭا تۇرلەرى جەتكىزىلە باستادى»، - دەدى ەلباسى. سونىمەن قاتار قازاقستان پرەزيدەنتى بۇگىن ەكى ەلدىڭ اراسىندا ۇلكەن فورۋم ءوتىپ، وعان ەكى تاراپتان 500 بيزنەسمەن قاتىساتىندىعىن اتاپ ءوتتى.
«ماعان ايتۋلارىنشا، شامامەن 1 ميلليارد دوللاردىڭ 75 كەلىسىمشارتىنا قول قويىلادى. بۇل وسى جىلدار ىشىندەگى ءبىزدىڭ تاريحىمىزدا العاش رەت ورىن الاتىن وقيعا»، - دەدى مەملەكەت باسشىسى.
ەلباسى ەكى مەملەكەت اراسىنداعى قارىم- قاتىناستىڭ نەگىزىن وزبەكستاننىڭ تۇڭعىش پرەزيدەنتى يسلام كاريموۆپەن بىرگە قالاعاندىعىن باسا ايتا كەلە:
«سىزبەن باۋىرلاس، تاياۋ ەل، تاتۋ كورشى رەتىندە ءبىر- بىرىمىزگە كومەك بەرە وتىرىپ، ەكى حالىقتىڭ ىنتىماعىن ودان ارى نىعايتىپ، سول ءداستۇردى جالعاستىراتىن بولامىز»، - دەدى.
اۆتور: مارلان جيەمباي
