ءۇندىستان قازاقستاندىق «ءال- فارابي-1» جەر سەرىگىن ۇشىردى

استانا. قازاقپارات - 15 - اقپان كۇنى ساعات 09.28-دە ءۇندىستان عارىش زەرتتەۋ ۇيىمى  (ISRO)  103 سپۋتنيكپەن قوسا، ءال- فارابي اتىنداعى قازاق ۇلتتىق ۋنيۆەرسيتەتى سوڭعى تەحنولوگيا ۇلگىسىمەن جاساعان سالماعى 1,7 كەلىلىك نانوسپۋتنيكتى ۇشىردى، دەپ حابارلادى ءۇندىستان ەلشىلىگىندە.

104 سپۋتنيك زىمىران تاسىعىش كومەگىمەن شريحاريكوتا ارالىندا ورنالاسقان ساتيش دحۆان اتىنداعى عارىش ورتالىعىنان وربيتاعا (PSLV-C37)  ۇشىرىلدى. ISRO اتالمىش قۇرىلعىنى ۇشىرعاننان كەيىن، ءبىر ۋاقىتتا ەڭ كوپ جەرسەرىكتى ۇشىرۋ بويىنشا الەمدىك رەكورد ورناتتى.

ءۇندىستاننىڭ 714 كەلىلىك «Cartosat-2» سەرىگى ۇشىرىلىمنىڭ نەگىزگى سپۋتنيگى اتاندى. ءبىر مەزەتتە ۇشىرىلعان 103 سپۋتنيكتىڭ تەك ەكەۋى ءۇندىستانعا تيەسىلى. قالعانى يزرايل (1)، قازاقستان (1)، نيدەرلاندى (1)، شۆەيتساريا (1)، بىرىككەن اراب امىرلىكتەرى (1) جانە امەريكا قۇراما شتاتتارى (96) سەكىلدى ەلدەردىڭ سەرىكتەرى بولىپ تابىلادى.

 PSLV- C37 بورتىنا تيەلگەن 104 سپۋتنيكتىڭ جالپى سالماعى  1378 كەلىنى قۇرايدى. اپپاراتتار 16 مينۋت 48 سەكۋند بويى ۇشقاننان كەيىن وربيتاعا جەتكەن. كەيىنگى 12 مينۋتتا بارلىق 104 قۇرىلعى جەكە جەكە ءبولىنىپ شىقتى.

 ءۇندىستان مەن قازاقستان عارىش قىزمەتى سالاسىنداعى سەرىكتەستىك تۋرالى مەموراندۋمعا 2009 -جىلدىڭ قاڭتار ايىندا قول قويعان.