اقتوبەدە 1 ميلليون گەكتار جەر پايدالانىلماي جاتىر
دەپ حابارلايدى قازاقپارات ءتىلشىسى.
اقتوبە جەر يەلەنىپ، ونى ۇزاق جىلدان بەرى كادەگە اسىرماي وتىرعان كاسىپكەرلەر بار. وبلىستىق جەردىڭ پايدالانىلۋى مەن قورعالۋىن باقىلاۋ جونىندەگى باسقارما ەگىستىك، شابىندىق، جايىلىم، ءتىپتى، قۇنارلى 1 ميلليون گەكتار جەردى انىقتادى. بارلىعى 858 جەر تەلىمى تىزىمگە الىندى.
«2016 -جىلى 580 مىڭ گەكتاردان استام جەر ەرىكتى تۇردە كەرى قايتارىلدى. ونىڭ 91 مىڭ گەكتارى ەگىستىك، 5 مىڭى شابىندىق، 478 مىڭى جايىلىم. ايتقانعا كونبەگەن، جەردى ءوزى پايدالانباي نەمەسە وزگەگە بەرمەي وتىرعان 234 جەر تەلىمىنىڭ يەسى 430 مىڭ گەكتار جەردى ءماجبۇرلى تۇردە قايتاردى. وبلىستىق پروكۋراتۋرامەن بىرلەسىپ اۋىل شارۋاشىلىعى، كوممەرتسيالىق ماقساتتاعى جەرلەردى قايتارۋ كەزىندە جول كارتاسى جاسالدى. اكىمشىلىك- قۇقىقتىق قۇزىرەتىمىز بولماعاندىقتان، جەرگىلىكتى پوليتسيا قىزمەتىنە جۇگىندىك. سەبەبى، كوبى قاشىپ كەتەدى، ۇيلەرىنە بارعان كەزدە ەسىگىن اشپايدى»، - دەدى وبلىستىق جەردىڭ پايدالانىلۋى مەن قورعالۋىن باقىلاۋ جونىندەگى باسقارما باسشىسى ابۋحات مىرزالين.
باسقارما 32 ماتەريالدى سوتقا جىبەرگەن. ونىڭ 12- ءسى قاناعاتتاندىرىلىپ، مەملەكەت پايداسىنا شەشىلدى. ال 9 ءىس بويىنشا ۇتىلىپ، اپپەلياتسيالىق شاعىم قايتا بەرىلدى.
«جەر تەلىمدەرىنىڭ ماقساتتى يگەرىلۋىن ۇنەمى باقىلاپ وتىرۋ ۋاقىت پەن قارجىنى تالاپ ەتەدى. جۇمىس كۇشى دە قاجەت. سوندىقتان «قازكوسموس» ۇلتتىق كومپانياسىنىڭ مۇمكىندىگىن پايدالانىپ، پروگرەسستيۆتى تەحنولوگيانى قولدانۋ ءتيىمدى. قىزمەتكەردى شالعاي جەرگە جىبەرمەي- اق «قازكوسموس» تۇسىرگەن فوتودان ەگىننىڭ بار- جوعىن دەر كەزىندە انىقتاي الامىز»، - دەدى وبلىس پروكۋرورىنىڭ ءبىرىنشى ورىنباسارى نۇرداۋلەت سۇيىندىكوۆ.
التىناي ساعىندىقوۆا
