قازاق جىگىتى حالىقتىڭ باسپانا ماسەلەسىن 1 تەڭگەگە شەشۋگە بولاتىنىن ايتتى
قولدانۋشى بۇل ۇسىنىسىن الەۋمەتتىك جەلىدە جاريالادى. «اسسالاۋماعالەيكۋم اعايىن! قازىرگى تاڭدا باسپانا ماسەلەسى بارشا قازاقتىڭ باستى ۋايىمىنا اينالىپ ۇلگەردى. اسىرەسە جاستاردىڭ. مەملەكەتتىك باعدارلامامەن بەرىلەتىن ۇيلەردىڭ سانى مۇقتاج جانداردىڭ 10 پايىزىن قامتاماسىز ەتە الماي كەلەدى. «ەندى قالاي باسپانالى بولام؟»- دەپ، تاپقانى تاماعىنان ارتىلمايتىن اعايىنعا قالاي ءۇي الىپ بەرۋگە بولادى؟ ەگەر ءبىز بىرىگە الساق، 1 تەڭگەمىزدى ءبىر وتباسى ءۇشىن قيساق بۇل ماسەلەنى دە شەشۋگە بولادى»، - دەيدى ول.
نۇرداۋلەت ءنۇرادىل بۇل ۇسىنىسىن بەدەلدى تۇلعالار مەن بەلدى اقپارات كوزدەرى قولداسا دەيدى.
«رەسمي اقپارات بويىنشا، قازاقستاندا 17 ميلليون 671 مىڭ ادام تۇراتىنى ءمالىم. ءبىز سونىڭ 7 ميلليونىن ەسەپكە المادىق دەگەننىڭ وزىندە 10 ميلليون ادام قالادى. مەنىڭشە 1 تەڭگەنى ساداقاعا بەرە الاتىن 10 ميلليون ادام بار. ەندەشە، بىزدە 10 ميلليون تەڭگە جينالادى»، - دەپ جازدى ول.
بۇل دەگەنىڭىز، ونىڭ پىكىرىنشە، الماتى مەن استانادان 1 نەمەسە 2 بولمەلى، ال قالعان قالالاردان 3-4 بولمەلى ءۇي الاتىن اقشا. «وسىلايشا ءار جۇما سايىن 1 تەڭگەدەن ساداقا بەرىپ وتىرساق، 1 جىلدا 52 وتباسىن باقىتقا بولەپ مول ساۋاپقا قالار ەدىك. ەگەر كۇن سايىن 1 تەڭگەدەن جينالسا 1 جىلدا 365 ادام باسپانالى بولادى. ەشقانداي تالان- تاراجسىز، باسقا باعىتقا ەمەس، تەك «1 تەڭگە = 1 ءۇي» دەپ قور اشىپ، قولداپ جىبەرەر ازاماتتار بولسا قازاقتىڭ باسپانا ماسەلەسى وزىنەن ءوزى- اق شەشىلەر ەدى!»، - دەگەن ۇسىنىس جاسادى قولدانۋشى.
وسىدان كەيىن ول وسى ماسەلەنى ءوزى قولعا العىسى كەلەتىنىن ايتتى. «ءوزىم قولعا السام با دەپ وتىرمىن. ۇلكەن اعالارىما جولىعىپ كورەم. كومەگىن بەرەر»، - دەپ جازدى ول پىكىر رەتىندە.
بۇل جازباعا قاتىستى پىكىر بىلدىرگەندەر ونىڭ ءسوزىن قولداي كەتتى. «وسى وي ماعان دا كەلىپ ءجۇر ەدى. ءوز كۇشىمىزبەن ءۇيلى بولساق وسىلاي. تەك سۇرار سۇراعىم، وسى ءۇي بەرىلەتىن ادامدار ءتىزىمى قالاي قۇرىلادى؟ وسى ۇسىنىس جۇزەگە اسسا، اي سايىن 1000 تەڭگە نەمەسە ودان كوپ بەرۋگە دايىنمىن. 4 بالالىمىز، باسپانا ماسەلەسى قينالتىپ تۇر. قۋانا-قۋانا قولدايمىن!»، - دەيدى دينارا كەريموۆا ەسىمدى قولدانۋشى.
«ءيا، تيىننان تەڭگە قۇرالادى، كوپ تۇكىرسە كول دەگەن وسى بولار...»، - دەپ جازدى ايگەرىم بالعىمبايەۆا دەگەن قولدانۋشى.
قولداۋ بىلدىرگەندەردىڭ اراسىندا بىرەۋلەرى ءبىر ادام ءبىر جىلعا 365 تەڭگە تولەپ قويسىن دەگەن دە پىكىرلەر جازىپ جاتىر.
