مەملەكەتتىك بيۋدجەت كىرىستەرى 1 تريلليون تەڭگەگە جۋىق اسىرا ورىندالدى - سۇلتانوۆ
«اعىمداعى جىلدىڭ 9 ايىندا مەملەكەتتىك بيۋدجەتتىڭ اتقارىلۋى ساپالى جەتىستىكتەرمەن ەرەكشەلەنەدى. كىرىستەر ايتارلىقتاي اسىرا ورىندالدى. ال سالىقتار بولسا، قازىردىڭ وزىندە بۇكىل وتكەن جىلدىڭ كولەمىنە كەلەتىندەي جينالدى. شىعىستار بۇل كەزەڭ ءۇشىن ەڭ جوعارعى مانگە جەتىپ يگەرىلدى. شىعىستاردىڭ جارتىسى الەۋمەتتىك بولىپ تابىلادى. ال 4\1- ءى ەكونوميكالىق وسىمگە باعىتتالعان. وڭىرلىك بيۋدجەتتەر ەكونوميكالىق تۇراقتىلىققا ارنالعان جاڭا ترانسفەرتتەرمەن قولداۋ تاپتى. جەرگىلىكتى بيۋدجەتتەر جالپى جاقسى ءوسىم كورسەتۋدە»، - دەدى مينيستر.
ونىڭ ايتۋىنشا، بيۋدجەت كىرىسى بيىل ايتارلىقتاي ءوسىم كورسەتىپ وتىر.
«كىرىستەر 1 تريلليون تەڭگەگە جۋىق اسىرا ورىندالدى. بۇل ماكروەكنوميكالىق جاعدايدىڭ جاقسارعانىن كورسەتىپ وتىر. مىسالى، بەلسەندى سالىق تولەۋشىلەردىڭ سانى 85 مىڭ كاسىپورىنعا جەتىپ، 7,3 پايىزعا ءوستى. كىرىستەردىڭ ارتىعىمەن ورىندالۋى بيۋدجەتتىڭ ناقتىلاۋىنا نەگىز بولدى. وسىلايشا كونترسيكلدى ساياساتتىڭ ناتيجەلەرى بايقالۋدا. ياعني، ەكونوميكانى قولداۋ قوسىمشا سالىقتاردى تۋىنداتادى. بۇل سالىقتار بيۋدجەت ارقىلى ەكونوميكاعا قايتىپ كەلەدى. جالپى مەملەكەتتىك بيۋدجەتتىڭ كىرىستەرى 126 پايىزعا اتقارىلدى. ونىڭ ىشىندە رەسپۋبليكالىق بيۋدجەت 131 پايىز، ال جەرگىلىكتى بيۋدجەتتەر 115 پايىزعا اتقارىلدى»، - دەپ اتاپ ءوتتى سۇلتانوۆ.
ءمينيستردىڭ ايتۋىنشا، مەملەكەتتىك بيۋدجەتتىڭ شىعىندارى بيىل 13 پايىزعا وسكەن. ونىڭ كولەمى 7 تريلليون تەڭگەگە جەتىپ وتىر. دارىگەرلەر، مۇعالىمدەر جانە وزگە دە بيۋدجەتتىك قىزمەتكەرلەردىڭ جالاقىسى ءوسىرىلدى. مەملەكەتتىك قىزمەتكەرلەردىڭ جالاقىسىنا كەتەتىن شىعىندار جالپى 18 پايىزعا ۇلعايدى جانە تريلليون تەڭگەگە جەتتى. شىعىنداردىڭ جارتىسىنان كوبى، شامامەن 3,6 تريلليون تەڭگە الەۋمەتتىك سالاعا جۇمسالدى. ونىڭ ىشىندە 1 تريلليون تەڭگە زەينەتاقى تولەمدەرىنە بولىنگەن.
اۆتور: جاسۇلان جولدىبايەۆ
