قاراعاندى وبلىسى بيىل بىرىككەن اراب امىرلىكتەرىنە 1 مىڭ باس قوي ەكسپورتتادى
بۇل تۋرالى بۇگىن استانادا ورتالىق كوممۋنيكاتسيالار قىزمەتىندە وتكەن بريفينگتە قاراعاندى وبلىسى اكىمىنىڭ اۋىل شارۋاشىلىق بويىنشا ورىنباسارى شاگۋراشيد مامالينوۆ ءمالىم ەتتى، دەپ حابارلايدى قازاقپارات.
«جاڭاارقا اۋدانىنىڭ «جەڭىس» اسىل تۇقىمدى مال زاۋىتى» ج ش س بىرىككەن اراب امىرلىكتەرىنىڭ ازىق- تۇلىك تاۋارلارىن يمپورتتايتىن جەتەكشى كومپانياسىمەن 10 مىڭ باس قويدى جەتكىزۋ تۋرالى كەلىسىمشارتقا قول قويعان. قازىرگى ۋاقىتتا ب ا ءا- گە العاشقى 1 مىڭ باس قوي ەكسپورتتالدى. ەكسپورتقا قاجەتتى مال باسىن قامتاماسىز ەتۋ ءۇشىن اۋىل شارۋاشىلىق كووپەراتيۆتەرى جۇمىلدىرىلادى»، - دەدى مامالينوۆ.
ونىڭ سوزىنشە، تاعى 1200 باس قويدى وزگە ەلگە جونەلتۋ جوسپارلانۋدا. اكىم ورىنباسارىنىڭ مالىمەتتەرى بويىنشا، وبلىستا 1,1 ميلليون باس قوي بار.
«جىلقى سانى بىزدە 275 مىڭ باس. جىلدىق ءوسىم 4-5 پايىزدى قۇرايدى. وبلىستا شاعىن شارۋا قوجالىقتارى مەن وزىندىك قوسالقى شارۋاشىلىقتاردى اۋىل شارۋاشىلىق وندىرىستىك كوپەراتيۆتەرىنە بىرىكتىرۋ جۇمىستارى جۇرگىزىلۋدە»، - دەپ اتاپ ءوتتى ول.
جالپى، قاراعاندى وبلىسىندا اگروونەركاسىپتىك كەشەن سالاسىندا 49 ميلليارد تەڭگەگە 62 يننوۆاتسيالىق جوبا قولعا الىنۋدا. قارجىلىق قولداۋ قورى ارقىلى 37 ميلليون تەڭگەگە 17 مال بورداقىلاۋ الاڭى سالىنعان.
اۆتور: جاسۇلان جولدىبايەۆ
