قازاقستاندا 1 ميلليون ادام نەسيەنى قايتارا الماي ءجۇر

استانا. قازاقپارات - قازاقستاندا حالىقتىڭ نەسيەلىك مادەنيەتى تومەن دەڭگەيدە قالىپ وتىر.

بۇل تۋرالى بۇگىن ق ر پارلامەنتى ءماجىلىسىنىڭ «كوللەكتورلىق قىزمەت تۋرالى» زاڭ جوباسى بويىنشا جۇمىس توبىنىڭ وتىرىسىنان كەيىن تىلشىلەرگە بەرگەن سۇحباتىندا ق ر ۇلتتىق بانكى ءتوراعاسىنىڭ ورىنباسارى ولەگ سمولياكوۆ ءمالىم ەتتى.

«بىزدە شامامەن 5 ميلليون جەكە تۇلعادا بانك نەسيەلەرى بار. ولاردىڭ 1 ميلليونىندا بەرەشەك 90 كۇننەن اسىپ كەتكەن. بانكتەردىڭ سۋدالىق پورفەلىنىڭ 20 پايىزى جەكە تۇلعالارعا تيەسىلى. بۇل نەگىزىنەن يپوتەكا مەن تۇتىنۋشىلىق نەسيەلەر»، - دەيدى و. سمولياكوۆ.

ونىڭ سوزىنە قاراعاندا، جەكە تۇلعالارعا بەرىلگەن نەسيەلەردىڭ 85 پايىزى ەشقانداي كەپىلدىكپەن قامتاماسىز ەتىلمەگەن. كەپىلدىكتىڭ بولماۋى قارىزدى تالاپ ەتۋدىڭ قيىندىعىنا بايلانىستى. ونىڭ ۇستىنە، بانكتەردەن نەسيە الۋعا كەلگەن قارىز الۋشىلاردىڭ 64 پايىزى ءوزىنىڭ تۇرعىلىقتى جەرى مەن قارجىلىق قابىلەتتەرى تۋرالى اقپاراتتى جاسىرادى. و. سمولياكوۆتىڭ پىكىرىنشە، بۇل حالىقتىڭ نەسيەلىك مادەنيەتى تومەن دەڭگەيدە قالىپ وتىرعاندىعىن بىلدىرەدى.

ايتا كەتەيىك، قازىر پارلامەنت ماجىلىسىندە ۇلتتىق بانك وكىلدەرىنىڭ قاتىسۋىمەن «كوللەكتورلىق قىزمەت» تۋرالى زاڭ جوباسى تالقىلانۋدا.