اراب شەيحى اقتوبەلىك زەرگەردەن 1 مىڭ دوللارعا ويۋلى بىلەزىك ساتىپ العان -فوتو

 استانا. قازاقپارات - كۇمىستەن ويۋ ويىپ، ءتۇرلى زەرگەرلىك بۇيىمدار دايىندايتىن اقتوبەلىك شەبەر بولات اتىراۋبايەۆ قازاقتىڭ ۇلتتىق اشەكەيلەرىنە شەتەلدە سۇرانىستىڭ جوعارى ەكەنىن ايتادى.

«بيىل كۋۆەيت مەملەكەتىندە بولىپ قايتتىق. ءالىمنىڭ 40 ەلىنەن قوناقتار كەلىپ، ۇلكەن دارەجەدەگى حالىقارالىق كورمە بولدى. مەندە ول جاقتا «قازاقتىڭ ونەرىن، مادەنيەتىن قالاي باعالار ەكەن» دەگەن وي بولدى. سەبەبى ءبىزدىڭ ءوزىمىز ۇلتتىق ونەرگە ەندى عانا دەن قويىپ جاتىرمىز. ءبىراق كۋۆەيت ەلىنە بارعاندا قاتتى تاڭ قالدىم. ولار ويۋلى زەرگەرلىك بۇيىمدارعا قاتتى قىزىقتى. اسىرەسە، قارا حيدجاب كيىپ العان قىزدار اراسىندا قازاقى ويۋ سالىنعان بەس بىلەزىككە سۇرانىس جوعارى بولدى. ءبىر قارا كيىم كيگەن قىز قايتا- قايتا كەلىپ قاراپ، ەكىنشى كۇنى كەلگەندە ساتىپ الىپ، ءبىزدىڭ ۇلتتىق اشەكەيلەرمەن بىرگە سۋرەتكە ءتۇسىپ كەتتى. شەيحتەر ويۋ تۇسكەن، ۇلكەن كوزدەرى بار كۇمىس ساقينالارعا قىزىعادى. قولدارىنا 2-3 ساقينانى قاتار تاعىپ الىپ كەتەدى. تۇركيادا قىزدارعا قاراعاندا ەر ادامدار ساقينالارعا قۇمار» ، - دەيدى بولات اتىراۋبايەۆ.

شەبەر شەتەلدىكتەردىڭ قازاقستاندىقتار تۋرالى كوپ بىلەتىنە تاڭ قالعان.

«كەيبىرەۋلەر سىرت ەلدەرگە شىعىپ ەدىك، قازاقستاندى ەشكىم بىلمەيدى» دەپ جاتادى. كەرىسىنشە، مەن 5-6 مەملەكەتتە بولدىم «قازاقستان، پرەزيدەنت نازاربايەۆ» دەپ ءبىزدىڭ ەل تۋرالى ايتىپ وتىرادى. ءوزىم سىرتقا ۇنەمى ۇلتتىق كيىم كيىپ شىعامىن. تۋدى جانىمىزعا قويىپ، ۇلتتىق بۇيىمدارىمىزدى جايىپ قويعاندا قاسىمىزعا كەلىپ ادامدار سەلفي جاساپ جاتادى. شىعارماشىلىق ادامدارى شەتەلگە كوبىرەك شىعۋ كەرەك. وزگە ەلدىڭ شەبەرلەرىنىڭ جۇمىستارىن كورەسىڭ، رۋحاني دەمالىپ قايتاسىڭ. كورمە كەزىندە شەبەرلىك ساباقتارى ءوتىپ جاتادى. بۇل ءبىز ءۇشىن ۇلكەن ولجا» ، - دەيدى ول.

شەبەر قازىر زەرگەرلىك جۇمىستارمەن قاتار زەرتتەۋ جۇمىستارىن دا قولعا الىپ جۇرگەنىن، جاڭا توپتاماسىنا باتىس وڭىرىنە ساي سالماقتى بۇيىمدار جاساپ جاتقانىن ايتادى.

 «شەتەلدەن تاپسىرىسپەن قولونەر بۇيىمدارىن سۇرايتىندار بار. ءبىراق تاسىمالداۋدا قۇجات جاساتۋدىڭ ماشاقاتى كوپ. شەتەلگە كورمەلەرگە شىققاندا سۇرانىستىڭ كوپ ەكەنىن كورىپ، قازاق ونەرىنىڭ جوعارى باعالاناتىنىن بايقايمىن. قازاقستاندا ەڭ قىمبات زەرگەرلىك بۇيىمدى 300 مىڭ تەڭگەگە دەيىن ساتتىم. كۋۆەيت ەلىندە شەيحتار سالماقتى بىلەزىكتى 1 مىڭ دوللارعا ساتىپ الدى. مۇنداي قارجىعا زەرگەرلىك بۇيىمداردى شىنايى قولونەردى تۇسىنەتىن ادامدار الادى» ، - دەيدى بولات اتىراۋبايەۆ.

Nur.kz