كۇماندى ەسەپ ايىرىسۋلار بويىنشا سالىقتىق تۇسىمدەر شىعىنى 1 تريلليون تەڭگەدەن اسىپ وتىر - ەسەپ كوميتەتى
بۇل تۋرالى بۇگىن پارلامەنت ماجىلىسىندە 2015-جىلعى رەسپۋبليكالىق بيۋدجەتتىڭ اتقارىلۋى تۋرالى ۇكىمەت ەسەبىنە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ قورىتىندىسى بويىنشا بايانداما جاساعان كوميتەت مۇشەسى جانسەيىت سارسەنقۇلوۆ ءمالىم ەتتى.
«ەسەپ كوميتەتىنىڭ پىكىرىنشە، جەتكىلىكتى دارەجەدەگى ءتيىمدى سالىقتىق اكىمشىلەندىرۋ بولماعاندىقتان، قولداعى بار سالىقتار ءتۇسىمى الەۋەتتى ءارى تولىق كولەمدە پايدالانىلمادى. بيۋدجەتتىڭ ەلەۋلى شىعىندارى سالىقتاردى تولەۋدەن جالتارۋ سحەمالارىن پايدالانۋ كەزىندە، سونىڭ ىشىندە جالعان كاسىپكەرلەرمەن ءوزارا ەسەپ ايىرىسۋلار ارقىلى قالىپتاستى.
ماسەلەن، 2016-جىلدىڭ 1- قاڭتارىنداعى جاعداي بويىنشا مەملەكەتتىك ساتىپ الۋلار بويىنشا جانە جەكەلەگەن باعدارلامالىق قۇجاتتاردى ىسكە اسىرۋ بارىسىندا كۇماندى ەسەپ ايىرىسۋلارداعى سالىقتىق تۇسىمدەر شىعىندارى 1 تريلليون تەڭگەدەن استام بولىپ وتىر»، - دەيدى ج. سارسەنقۇلوۆ.
ونىڭ سوزىنە قاراعاندا، تەكسەرۋ بارىسىندا زاڭ بۇزۋشىلىقتاردى جويۋ تۋرالى حابارلامانى ورىنداماعان كەيبىر سۋبەكتىلەرگە سالىقتىق تەكسەرۋلەر جۇرگىزىلمەۋ فاكتىلەرى دە انىقتالعان. «مۇنداي فاكتىلەر بويىنشا مىسالدار بارشىلىق. جەكەلەگەن سالىق تولەۋشىلەردىڭ قوسىلعان قۇن سالىعىنان جالتارۋدىڭ ءتۇرلى سحەمالارى دا انىقتالدى. بۇنداي وقيعالار بويىنشا بيۋدجەتتىڭ بولجامدى شىعىندارى 7 ميلليارد تەڭگەدەن اسادى»، - دەدى ج. سارسەنقۇلوۆ.
اۆتور: قانات مامەتقازى ۇلى
