كەڭەس راقىشەۆ «قازكوممەرس بانك» كليەنتتەرىنە 1 كۇن قىزمەت كورسەتەتىن بولادى

الماتى. قازاقپارات - «قازكوممەرس بانك» ا ق باسقارما ءتوراعاسى كەڭەس راقىشيەۆ باسپا ءسوز ءماسليحاتى بارىسىندا ءبىر جۇمىس كۇنىن بانك كليەنتتەرىنە قىزمەت كورسەتۋگە ارنايتىنىن مالىمدەدى.

بەلگىلى بيزنەسمەن ۇنەمى الەۋمەتتىك جەلىدەن بانك سەرۆيسى تۋرالى ەلدىڭ وي پىكىرىن وقيتىنىن جەتكىزدى.

«سەرۆيس... فەيسبۋكتان كوممەنتاريلەردى وقىدىم. بۇل جاعىنان ءبىز ءبىراز ارتتا قالىپ قويىپپىز. كليەنتتەردىڭ ءبىز تۋرالى جاعىمسىز جازعانىنىڭ ءوزى ولاردىڭ بىزدەن باسقا بانككە اۋىسپاعانىن كورسەتەدى. قازىر كوممەرتسيالىق بانكتەر وتە كوپ. ءبىراق، بەلگىسىز سەبەپتەرگە بايلانىستى ءبىز ولاردى ساعاتتاپ كۇتۋگە ماجبۇرلەيمىز»، - دەدى ديرەكتورلار كەڭەسىنىڭ باسشىسى.

ونىڭ ايتۋىنشا، كليەنت ەش جاعدايدا كوپ كۇتپەۋى كەرەك.

 «مەن بۇل ماسەلەمەن اينالىسامىن. تەستىلىك رەجيمدە بانكتىڭ قىزمەتىن جاڭارتامىز، جاڭا ديزاين، جاڭا قىزمەت ۇسىنامىز. بۇل ءۇشىن مەن جانە مارك حولتسمان، اباي يسكاندەروۆ ۇشەۋىمىز بانك كليەنتتەرىنە ءبىر كۇن قىزمەت ەتەتىن بولامىز. كليەنت ءبىز ءۇشىن ەڭ باستى باسىمدىققا يە»، - دەدى ك. راقىشەۆ.

اۆتور: گۇلميرا عوسمانالي