قازاقستان دۇنيەجۇزىلىك بانكتەن 1 ميلليارد دوللار قارىز الادى

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى

(ماكروەكونوميكالىق باسقارۋ جانە ەكونوميكانىڭ باسەكەگە قابىلەتتىلىگىن ارتتىرۋ سالاسىنداعى دامۋ ساياساتىن قارجىلاندىرۋ بويىنشا ءبىرىنشى كرەديت) راتيفيكاتسيالاۋ تۋرالى» زاڭ جوباسىن ماقۇلدادى.

كەلىسىمگە 2016-جىلدىڭ 17- اقپانىندا استانا قالاسىندا قول قويىلعان.

كەلىسىمگە سايكەس، دۇنيەجۇزىلىك بانك قازاقستانعا ماكروەكونوميكالىق باسقارۋ جانە ەكونوميكانىڭ باسەكەگە قابىلەتتىلىگىن ارتتىرۋ ساياساتىن قارجىلاندىرۋ ءۇشىن 1 ميلليارد دوللار مولشەرىندە قارىز بەرەدى. قارىز قاراجاتى ەلىمىزدىڭ الەۋمەتتىك-ەكونوميكالىق دامۋىنىڭ نەگىزگى باسىمدىقتارىن قولداۋعا جانە ۇكىمەتتىڭ ەكونوميكالىق ىنتالاندىرۋ جانە ەكونوميكالىق وسىمگە كومەكتەسۋ جونىندەگى ستراتەگيالىق شارالارىن ورىنداۋعا مۇمكىندىك بەرەدى.

«اتالعان قارىز اعىمداعى جىلعى بيۋدجەتتىڭ تاپشىلىعىن قارجىلاندىرۋعا باعىتتالادى. تارتىلاتىن قارىزدى وتەۋ رەسپۋبليكالىق بيۋدجەت ەسەبىنەن جۇزەگە اسىرىلادى. قارىز بەكىتىلگەن بيۋدجەت تاپشىلىعى جاعدايىندا ماكروەكونوميكالىق تۇراقتىلىقتى جانە مەملەكەتتىك قارجىلىق تەڭگەرىمدىلىكتى قامتاماسىز ەتۋ تۇرعىسىنان ماڭىزدى بولادى»، - دەدى ق ر قارجى ءمينيسترى باقىت سۇلتانوۆ.

جالپى قارىز قازاقستانعا 2,5 جىلدىق جەڭىلدىك كەزەڭدى قوسا العاندا 20 جىل وتەۋ مەرزىمىمەن بەرىلەدى. سىياقى مولشەرلەمەسى ءبىرجولعى قارىز سوماسىنىڭ 0,25 پايىزى، رەزەرۆكە قويعانى ءۇشىن كوميسسيا جىلىنا قارىز بويىنشا پايدالانىلماعان تەڭگەرىمنىڭ 0,25 پايىزىنا تەڭ بولادى.

ءماجىلىس دەپۋتاتتارى كەلىسىمدى وڭ باعالاپ، قۇجاتتى ماقۇلدادى. ەندى زاڭ جوباسى سەناتقا جولدانادى.

اۆتور: قانات مامەتقازى ۇلى