الماتى-1 - شۋ تەمىر جولى قۇرىلىسىنا تۇڭعىش رەت قازاقستاندا شىعارىلعان رەلستەر توسەلدى
العاشقى رەلس توسەلگەن سوڭ، الماتى وبلىسىنىڭ اكىمى اماندىق باتالوۆ پەن «قازاقستان تەمىر جولى» ۇ ق» ا ق پرەزيدەنتى اسقار مامين قولدارىنا 41- ولشەمدى كىلتتى الىپ، ەكى رەلستىڭ جىگىن ۇستاپ تۇراتىن قاپتامانى بەكىتتى.
ءوز سوزىندە «قازاقستان تەمىر جولى» ۇ ق» ا ق پرەزيدەنتى اسقار مامين الماتى-1 - شۋ ۋچاستوگىنداعى ەكىنشى تەمىر جول قۇرىلىسى «نۇرلى جول» باعدارلاماسى اياسىندا جۇزەگە اسىرىلىپ جاتقاندىعىن ايتتى.
«بۇل ەكىنشى جول، جىلجىمالى قۇرامنىڭ ونىمدىلىگىن ارتتىرۋعا، ەنەرگەتيكالىق شىعىنداردى ازايتۋعا جانە پويىزداردىڭ جىلدامدىعىن ارتتىرۋعا مۇمكىندىك بەرەدى. جوبا جۇزەگە اسىرىلعان سوڭ، ۋچاستوكتىڭ وتكىزۋ مۇمكىندىگى 3,2 ەسەگە ارتادى، ال جۇك پويىزدارىنىڭ وتكىزىلۋى تاۋلىگىنە 68 پويىزعا دەيىن كوبەيەدى»، - دەدى ا. مامين
الماتى-1 - شۋ ۋچاستوگىندا بارلىعى 110 شاقىرىمدىق تەمىر جول ماگيسترالى جانە 10 شاقىرىم ستانسالىق جولدار سالىنادى. قازىر، 16 كوپىر مەن 80 سۋ قۇبىرىن ورناتۋ جۇمىستارى جۇرگىزىلىپ جاتىر.
اۆتور: ايبوتا جاپپاربەرگەن
