قازاقستاندا 1 ميلليونعا جۋىق ايەل بالا كوتەرە الماي ءجۇر - پروفەسسور ءسادۋاقاس مۇستافايەۆ
ەكى كۇن ىشىندە جوعارى بىلىكتى ماماندار 200 گە جۋىق ايەلگە تەگىن قىزمەت كورسەتۋدى جوسپارلاپ وتىر.
1999-جىلى نەگىزى قالانعان ەمحانانىڭ نەگىزگى كورپۋسى قاسكەلەڭدە ورنالاسقان. بيىل جىلدىڭ باسىندا اتالعان ەمحانانىڭ الماتىداعى بولىمشەسى اشىلدى.
اتالعان ەمحانانىڭ ديرەكتورى، مەديتسينا عىلىمدارىنىڭ دوكتورى، پروفەسسور ءسادۋاقاس مۇستافايەۆتىڭ ايتۋىنشا، قازاقستاندا بەدەۋلىك كورسەتكىشى جىلدان جىلعا ارتىپ كەلەدى.
«بۇگىندە قازاقستاندا بالا تۋۋعا قابىلەتتى 4 ميلليون 600 مىڭ ايەلدىڭ 18-20 پايىزى بەدەۋلىككە شالدىققان. ياعني، ميلليونعا جۋىق ايەل ءبىر پەرزەنتكە زار بولىپ وتىر. ولاردىڭ 60 پايىزى ميوما، ءتۇرلى ىسىكتەرگە شالدىققان، قالعان 40 پايىزى ءتۇرلى قابىنۋ پروتسەستەرىنىڭ سالدارىنان، گورموندىق اۋىتقۋلاردان زارداپ شەگىپ وتىر. سوڭعى ءۇشى جىلدا ەمحانامىزعا جۇبىمەن كەلگەن ەر ادامداردىڭ بارلىعىنىڭ دەرلىك دەنساۋلىعىندا اقاۋ بار. ۇرپاق جالعاستىرۋ قابىلەتى ساپاسى جاعىنان دا، سانى جاعىنان دا ءالسىز بولىپ جاتىر»، - دەدى س. مۇستافايەۆ.
ورتالىقتا جىلىنا 400 دەن اسا وتا جاسالادى. ولاردىڭ تەڭ جارتىسى ايەلدەردىڭ بالا سۇيۋگە قابىلەتىن ساقتاپ قالۋعا باعىتتالادى.
سونداي اۋىر ناۋقاستاردىڭ ءبىرى اتىراۋلىق 35 جاستاعى كەلىنشەككە كەشە وتا جاسالدى. ول قازىر ەسىن جيدى. كەلىنشەكتىڭ ىشىنەن 9 ىسىك الىنعان. ناۋقاس 20 جاسىندا ينسۋلت العان ەكەن. سوندا دا دارىگەرلەر ونىڭ پەرزەنت ءسۇيۋ ءۇشىن جاتىرىن الىپ قالدى. پروفەسسوردىڭ ايتۋىنشا، اتالعان ورتالىقتا ءبىر كەلىنشەكتەن 27 كەلى ىسىك الىنعان.
«مۇمكىن مەنى ارىپتەستەرىم سىنايتىن شىعار. ءبىراق، دارىگەر ادام جانىن اراشالاۋدان بولەك، ونىڭ پروبلەماسىن شەشۋى كەرەك. ءبىز ءبىر ورگاندى الىپ تاستاي سالاتىن قاساپشى ەمەسپىز»، - دەدى پروفەسسور س. مۇستافايەۆ.
ال، شيپا ىزدەپ كەلگەن ايەلدەردىڭ ەڭ ۇلكەنى 52 جاسىندا ءسابي سۇيگەن.
بۇگىن كەلگەن ناۋقاستاردى گينەكولوگ، ماممولوگ، تەراپيەۆت، پسيحوتەراپيەۆت، كوسمەتولوگ تەگىن قابىلداپ جاتىر. سونداي-اق، كىشى جامباس ورگاندارىنىڭ ۋدز تەگىن جۇرگىزىلۋدە. سونداي-اق، وڭتۇستىك كورەيالىق پروفەسسور كيم سۋ پوم كۆانت تەراپياسى، ينە رەفلەكس تەراپياسى ارقىلى دياگنوستيكا جاسايدى.
اۆتور: گۇلميرا عوسمانالي
