ەلوردالىق ارداگەرلەرگە جەڭىس كۇنىنە وراي 1 ميلليون تەڭگەدەن تولەنەدى

كەشە استانادا بەسىنشى شاقىرىلىمداعى قالالىق ءماسليحاتتىڭ سەسسياسى ءوتتى.

وتىرىس بارىسىندا استانا قالاسى اكىمىنىڭ ورىنباسارى اندرەي لۋكين جاقىن ارادا قانداي جوبالارعا قارجى بولىنەتىنى تۋرالى باياندادى، دەپ حابارلادى astana-akshamy.kz.

2015-جىلعى 11- جەلتوقسانداعى «استانا قالاسىنىڭ 2016-2018-جىلدارعا ارنالعان بيۋدجەتى تۋرالى» استانا قالاسى ءماسليحاتىنىڭ شەشىمىنە وزگەرىستەر مەن تولىقتىرۋلار ەنگىزۋ ماسەلەسىن قاراستىرا كەلە، ا. لۋكين تاۋەلسىزدىكتىڭ 25 جىلدىعىنا ارنالعان مونۋمەنتتى جاساۋعا جانە ورناتۋعا جەرگىلىكتى بيۋدجەتتەن 100 ميلليون تەڭگە بولىنەتىنىن اتاپ ءوتتى. ونىڭ ايتۋىنشا، سونداي-اق، بيۋدجەتتە تريۋمفالدى اركانىڭ جانىنداعى دوڭگەلەك الاڭدى اباتتاندىرۋ قاراستىرىلعان.

استانا اكىمىنىڭ باسپا ءسوز قىزمەتى حابارلاعانداي، وتىرىس بارىسىندا استانادا مۇگەدەكتەردى، قارتتار مەن اۋرۋ جانداردى كۇتۋ بويىنشا جاڭا كاسىپورىن اشىلاتىنى ءمالىم بولدى.

- قازىرگى كەزدە الەۋمەتتىك جۇمىسكەرلەر ءۇش اۋداندىق اكىمدىكتىڭ قۇرامىندا. ولاردىڭ جالپى سانى - 112 ادام. ەندى بۇل جۇمىسكەرلەر ءبىر مەملەكەتتىك-كوممۋنالدىق كاسىپورىنعا بىرىكتىرىلەدى، ول مۇگەدەكتەردى، قارتتار مەن سىرقات جانداردى كۇتۋ بويىنشا قىزمەتتەر اۋقىمىن كەڭەيتەدى. مۇقتاج جاندارعا ۇيلەرىندە الەۋمەتتىك كومەك كورسەتۋ جونىندەگى مەملەكەتتىك باعدارلاما اياسىندا اۋدان اكىمدىكتەرىنە 185 ميلليون تەڭگە كولەمىندە قارجى ءبولىنىپ، جۇمىسپەن قامتۋ جانە الەۋمەتتىك قورعاۋ باسقارماسىنىڭ فۋنكسيالارى الەۋمەتتىك قىزمەت كورسەتۋ ورتالىعىنا بەرىلەدى. بۇل كاسىپورىنعا اۋرۋ ادامداردى، قارتتاردى كۇتۋدى قاجەت ەتەتىندەردىڭ بارلىعى جۇگىنە الادى. الداعى ۋاقىتتا قىزمەتتەر اۋقىمى كەڭەيە تۇسپەك، - دەدى اندرەي لۋكين.

استانا قالاسى اكىمىنىڭ ورىنباسارى تۇسكەن قارجى ازاماتتىق قىزمەتشىلەرگە ەڭبەكاقى تولەۋگە جۇمسالاتىنىن جەتكىزدى. بۇل ماقساتتارعا قوسىمشا قارجىلار بولىنبەيدى، ول قايتا ۇلەستىرىلەدى.

كاسىپورىن ءوز جۇمىسىن بيىل ءساۋىر ايىندا باستايدى.

سونىمەن قاتار، پسيحونيەۆرولوگيالىق ديسپانسەر سالۋ تۋرالى شەشىم قابىلداندى. ا. لۋكين ەڭ جاقىن پسيحونيەۆرولوگيالىق ديسپانسەردىڭ اقمولا وبلىسىنىڭ اقكول قالاسىندا ورنالاسقانىن اتاپ ءوتتى.

كەزەكتەن تىس سەسسيا بارىسىندا بيىل ەلوردالىق ارداگەرلەرگە 9- مامىر مەرەكەسىنە وراي تاعى دا 1 ميلليون تەڭگەدەن تولەنەتىنى ايتىلدى. جالپى، استانادا ۇلى وتان سوعىسىنا قاتىسقان 172 ادام تۇرىپ جاتىر. قالالىق ءماسليحات دەپۋتاتتارى بۇل باستامانى ءبىراۋىزدان قولدادى.

وتىرىس سوڭىندا جەرگىلىكتى بيۋدجەتكە ەنگىزىلەتىن تۇزەتۋلەر بەكىتىلدى. اندرەي لۋكيننىڭ مالىمەتىنشە، 2016-جىلدىڭ باسىندا قالالىق قازىنادا 9 ميلليارد 200 ميلليون تەڭگە كولەمىندە بوس قاراجات قالعان. كىرىس بولىگى نەگىزگى الەۋمەتتىك-ەكونوميكالىق كورسەتكىشتەردىڭ ارتۋىمەن بايلانىستى. ونىڭ ايتۋىنشا، بۇل قارجىدان قالانىڭ قاجەتتىلىكتەرىنە 8 ميلليارد تەڭگە جۇمساۋ كوزدەلگەن.