قازاقستاندا 1 -قاڭتاردان جاڭا ەڭبەك كودەكسى كۇشىنە ەندى
ايتا كەتەرلىگى، جاڭا كودەكس ەلباسى ن. نازاربايەۆ ايقىنداعان بەس ينستيتۋتسيونالدىق رەفورماداعى تاپسىرمالاردى ىسكە اسىرۋعا باعىتتالادى. سونىمەن قاتار، قۇجات ەڭبەك قاتىناستارىن رەتتەۋدىڭ جاڭا مودەلىن قامتيدى. ول حالىقارالىق ەڭبەك ۇيىمىنىڭ، ەكونوميكالىق ىنتىماقتاستىق جانە دامۋ ۇيىمىنىڭ ەڭبەك ستاندارتتارىنا نەگىزدەلگەن.
جاڭا ەڭبەك كودەكسى ەڭبەك قاتىناستارى سالاسىندا جۇمىس بەرۋشى مەن قىزمەتكەرلەر اراسىندا مەملەكەتتىك ارالاسۋ شەگىن ايقىنداۋدى، ەڭبەك قاتىناستارى سۋبەكتىلەرىنىڭ ءرولى مەن جاۋاپكەرشىلىگىن جىكتەۋدى ۇسىنادى. كودەكستە جۇمىس بەرۋشىلەر ءۇشىن ءبىر جاعىنان بەلگىلى ءبىر كولەمدە جۇمىسقا جالداۋ، كادرلىق جىلجۋ، جۇمىستان بوساتۋ، قىزمەتكەرلەرىنىڭ ەڭبەك جاعدايلارى مەن ەڭبەگىنە اقى تولەۋ راسىمدەرى جەڭىلدەتىلگەن. ەكىنشى جاعىنان قىزمەتكەرلەردىڭ بازالىق ەڭبەك مۇمكىندىكتەرى مەن قۇقىقتارى بەلگىلەنىپ، جەكە ۇجىمدىق شارتتار مەن كەلىسىمدەر ارقىلى كەڭەيتۋ كوزدەلگەن. وسىلايشا، ءوز دارەجەسىندە دامىماي كەلگەن كەلىسىمدەر مەن ۇجىمدىق شارتتار ءرولىن كوتەرۋ قاراستىرىلعان.
«جاڭا ەڭبەك كودەكسى جوباسى كاسىپكەرلىكتى، ەڭبەك نارىعىن دامىتۋدى، شەتەلدىك ينۆەستورلار تارتۋدى بەلسەندىرە تۇسپەك. بۇدان باسقا، مۇگەدەكتەردى، جاستاردى، وتباسىلىق مىندەتتەرى بار ادامداردى قوسا العاندا، جۇمىسكەرلەردىڭ جەكەلەگەن ساناتتارى ءۇشىن جۇمىس ورىندارىن قۇرۋعا ىنتالاندىرۋعا باعىتتالعان ءبىرقاتار شارالار دا قامتىلادى. جالپى، كودەكس جوباسىندا الەۋمەتتىك قورعاۋ، ادىلەتتىلىك، ەكىنشى جاعىنان، ەكونوميكالىق تيىمدىلىك اراسىنداعى وڭتايلى تەپە- تەڭدىكتى ۇيلەستىرۋدى ساقتاۋ كوزدەلەدى»، - بولاتىن جاڭا كودەكسكە قاتىستى دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا.
اۆتور: مارلان جيەمباي
