الماتىدا تۇڭعىش رەت 1- رەسپۋبليكالىق جاس مۇراعاتشىلار بايقاۋى باستالدى
وعان الماتى، شىعىس قازاقستان، جامبىل، باتىس قازاقستان، قىزىلوردا وبلىستارىنىڭ مەملەكەتتىك مۇراعاتتارىنىڭ، قازاقستان رەسپۋبليكاسى ورتالىق مەملەكەتتىك مۇراعاتىنىڭ، الماتى قالاسى ورتالىق مەملەكەتتىك مۇراعاتىنىڭ، قازاقستان رەسپۋبليكاسى پرەزيدەنتى مۇراعاتىنىڭ كوماندالارى قاتىسۋدا.
بايقاۋدىڭ سالتاناتتى اشىلۋ راسىمىندە سويلەگەن سوزىندە قازاقستان رەسپۋبليكاسى پرەزيدەنتى مۇراعاتىنىڭ ديرەكتورى، تەحنيكا عىلىمدارىنىڭ دوكتورى، پروفەسسور بوريس جاپاروۆ وتكەن تاريحتى سارالاپ، وعان كەرەكتى زەرتەتۋلەر جۇرگىزىپ، ولاردى بولاشاقتىڭ پايداسىنا ۇسىنىپ وتىرۋ - مۇراعاتشىلاردىڭ نەگىزگى مىندەتى ەكەندىگىن ايتا كەلە، بايقاۋعا قاتىسۋشىلارعا ساتتىلىك تىلەدى.
«بۇگىنگى بايقاۋدى ۇيىمداستىرۋداعى باستى ماقساتىمىز - مۇراعات سالاسىندا قىزمەت ىستەپ جۇرگەن جاس مامانداردىڭ كاسىبي بىلىكتىلىگىن ارتتىرۋ، وتانعا دەگەن پاتريوتتىق كوزقاراسىن، ءىس جۇرگىزۋدە ۇيىمداستىرۋشىلىق قابىلەتىن ارتتىرۋ. سونداي-اق، مۇراعات سالاسىنىڭ قوعامعا، مەملەكەتكە قانشالىقتى قاجەتتىگىن كورسەتۋ، ونى دارىپتەۋ جانە وسى سالادا ەڭبەك ەتىپ جۇرگەن مامانداردىڭ ەڭبەگىن ناسيحاتتاۋ. وسى ارقىلى جاستاردىڭ مۇراعات قىزمەتىنە دەگەن قىزىعۋشىلىعىن وياتۋ. ويتكەنى، مىنا نارىق اياسىندا مۇراعاتشىلاردىڭ تۋىن تومەن تۇسىرمەي ونى حالىقارالىق دەڭگەيگە كوتەرۋ جاس بىلىكتى ماماندارعا جۇكتەلەدى. بۇل بايقاۋدىڭ ماڭىزى وتە زور. ويتكەنى مۇندا مۇراعاتشىلار ءبىر- بىرىمەن تانىسىپ، ءوزارا تاجىريبە الماساتىن بولادى. سوندىقتان ول الداعى ۋاقىتتا ءداستۇرلى شاراعا اينالىپ، جالعاسىن تابادى دەگەن ويدامىن»، - دەدى ب. جاپاروۆ.
وسىدان كەيىن كاسىبي قازىلار القاسى مەن كورەرمەندەر الدىنا سەگىز كوماندا شاقىرىلدى.
باتىس قازاقستان وبلىستىق مەملەكەتتىك مۇراعاتىنىڭ - «اقجايىق»، الماتى قالالىق مەملەكەتتىك ءمۇراعاتىنىڭ - «مۇراعاتشىلار - مازاسىز جۇرەكتەر»، جامبىل وبلىستىق مەملەكەتتىك مۇراعاتىنىڭ - «ەجەلگى تاراز»، قازاقستان رەسپۋبليكاسى پرەزيدەنتى مۇراعاتىنىڭ - «جاس قىران»، سەمەي قالاسىنداعى «قازىرگى زامان تاريحىن قۇجاتتاندىرۋ ورتالىعىنىڭ» - «ميراس»، الماتى وبلىستىق مەملەكەتتىك مۇراعاتىنىڭ - «مۇراعات ارۋلارى»، قازاقستان رەسپۋبليكاسىنىڭ ورتالىق مەملەكەتتىك مۇراعاتىنىڭ - «مۇراعات جاستارى» جانە قىزىلوردا وبلىستىق مەملەكەتتىك مۇراعاتىنىڭ - «ياكسارت» كوماندالارى جۇرتشىلىق الدىنا شىعىپ، وزدەرىنە ءتان ەرەكشە كيىم ۇلگىلەرىمەن ءتانتى ەتتى.
وسىدان كەيىن 5 ادامنان تۇراتىن 8 كوماندا ءوز ورىندارىنا جايعاسىپ، بايقاۋ تاپسىرمالارىن ورىنداۋعا كىرىستى.
بايقاۋ ەرەجەسى بويىنشا وعان قاتىسۋشىلار وزدەرىنىڭ كاسىبي بىلىكتىلىگى مەن شىعارماشىلىق قابىلەتىن ءتورت كونكۋرستىق تاپسىرمادا كورسەتە الۋى ءتيىس. ءبىرىنشى، ءوز مۇراعاتىنىڭ جۇمىسىن اسەرلى ەتىپ تانىستىرۋ. ەكىنشى، تەوريالىق دايىندىق دەڭگەيىن كورسەتۋ: «ۇلتتىق مۇراعات قورى جانە مۇراعاتتار تۋرالى» ق ر زاڭى بويىنشا سۇراقتار. ءۇشىنشى، تاجىريبەلىك دايىندىق دەڭگەيىن كورسەتۋ: مۇراعات قۇجاتتارىن تولىقتىرۋ، ساقتاۋ جانە پايدالانۋ بويىنشا سۇراقتار جانە ءتورتىنشى، شىعارماشىلىق تاپسىرما. ءوز ونەرىن كورسەتۋ.
بايقاۋ ودان ءارى جالعاسۋدا. جۇلدەلى ورىندارعا يە بولعان كوماندالارعا ديپلومدار مەن ءارتۇرلى باعالى سىيلىقتار تابىس ەتىلەدى.
ايتا كەتەلىك، بايقاۋدى ۇيىمداستىرۋعا قازاقستان رەسپۋبليكاسى مادەنيەت جانە سپورت مينيسترلىگىنىڭ مۇراعاتتىق ءىس جانە قۇجاتتاما دەپارتامەنتى جان-جاقتى قولداۋ كورسەتتى.
