كەي اۋىلداعى مەكتەپتەردە 1-سىنىپقا ءبىر بالا قابىلداعان وقۋ ورىندارى دا بار

شاعىن اۋىلدارداعى باستاۋىش مەكتەپتەردىڭ اراسىندا ءبىرىنشى سىنىپقا ءبىر بالا قابىلداعان وقۋ ورىندارى دا بار.
- «بيىل مەن دە مەكتەپكە،
بىرىنشىگە بارامىن.
ماقتانبايمىن مەن تەككە،
دايىن داپتەر، قالامىم»، - دەگەن تاقپاق ايتقان نۇربول ءنابيدۋللا - 2015-2016 وقۋ جىلىندا قىزىلوردا قالاسى تاسبوگەت كەنتىنە قاراستى يىركول اۋىلىنداعى باستاۋىش مەكتەپكە بارعان جالعىز بالا.
ءبىلىم كۇنىندە وتكەن العاشقى قوڭىراۋ شاراسى كەزىندە مەكتەپ مەڭگەرۋشىسى قارلىعاش ابدراحمانوۆا «بيىل ءبىرىنشى سىنىپقا قابىلدانعان نۇربولعا پرەزيدەنت نۇرسۇلتان نازاربايەۆتان ارنايى سىيلىق كەلگەنىن» حابارلاپ، وعان سىيلىعىن رەسمي تۇردە تاپسىردى.
نۇربولدىڭ اناسى شارا تەبەرىكوۆا بۇل مەكتەپتە بۇعان دەيىن بەس بالاسى وقىعانىن ايتادى. سوندىقتان ۇلىنىڭ ءبىر سىنىپتا جالعىز ءوزى وقيتىنى ول كىسىگە تاڭسىق كورىنبەگەن.
- نۇربول بىلتىر دايىندىق سىنىبىندا وقىپ، مەكتەپتەگى بىرنەشە ۇيىرمەلەرگە قاتىسقان. ءبىر ءوزى وقىسا دا، وقي بەرەدى، - دەيدى شارا تەبەرىكوۆا.
«ءتورت سىنىپتا 10 بالا وقيدى»
تاسبوگەت كەنتىنەن 35 شاقىرىم جەردەگى يىركول اۋىلىندا 23 ءۇي تۇرادى. 2005 -جىلى سۋ تاسقىنىنان كەيىن شاعىن اۋىلعا لايىقتاپ 20 ورىندىق شاعىن جيناقتى باستاۋىش مەكتەپ سالىنعان. ازاتتىق ءتىلشىسى بۇگىن وسى مەكتەپكە بارعاندا ون شاقتى وقۋشى، ءۇش- ءتورت اتا- انا، ءۇش ءمۇعالىم مەن مەكتەپ مەڭگەرۋشىسى جاڭا وقۋ جىلىنىڭ اشىلۋ سالتاناتىن وتكىزىپ جاتتى.
مەكتەپ مەڭگەرۋشىسى قارلىعاش ابدراحمانوۆانىڭ ايتۋىنشا بۇل باستاۋىش مەكتەپتە بيىل 10 وقۋشى وقيدى. شاعىن جيناقتى مەكتەپتەرگە ارنالعان باعدارلاما بويىنشا، ءبىرىنشى سىنىپقا بارعان جالعىز وقۋشى نۇربولدى بولەك وقىتادى. ال ەكىنشى، ءۇشىنشى جانە ءتورتىنشى سىنىپتاعى 9 بالا ءبىر بولەك وقيدى. ءبىرىنشى سىنىپ وقۋشىسى نۇربول اعىلشىن ءتىلى ءپانىن عانا ولارمەن بىرگە وقيدى.
- نەگىزىنەن مال شارۋاشىلىعىمەن، بالىقشىلىقپەن شۇعىلداناتىن بۇل اۋىلدىڭ تۇرعىندارىنىڭ سانى 150 گە دە جەتپەيدى. بالا سانى از بولعان سوڭ قالاعا تاسىپ وقىتۋ ءۇشىن ارنايى كولىك تە بولىنگەن. ءبىراق اتا- انالارى جول قاۋىپسىزدىگىن ويلاپ قارسى بولدى. وقۋشى از بولعانىمەن ءبىلىم ساپاسى وزگەلەردەن كەم ەمەس. بيىل كوكتەمدە 4-سىنىپتا وقيتىن وقۋشىمىز ۋكراينادا وتكەن حالىقارالىق وليمپيادادان 2-ورىن الىپ كەلدى، - دەيدى مەكتەپ مەڭگەرۋشىسى قارلىعاش ابدراحمانوۆا.
3268 شاعىن جيناقتى مەكتەپ بار
ءبىرىنشى سىنىپقا ءبىر بالا عانا بارعان يىركول مەكتەبى سياقتى باستاۋىش وقۋ ورىندارى قازاقستاننىڭ ءار تۇكپىرىندە كەزدەسەدى. سولاردىڭ بىرىنە - قاراعاندى وبلىسىنداعى جەزقازعان قالاسىنا قاراستى تۇيەمويناق اۋىلىندا مەكتەپتىڭ ءبىرىنشى سىنىبىنا بيىل ەكى بالا بارعان.
- تۇيەمويناق اۋىلىندا مەكتەپتە 8 وقۋشى بار. بيىل ءبىرىنشى سىنىپقا ەكى وقۋشى باردى. بۇل مەكتەپتە 3 مۇعالىم جۇمىس ىستەيدى. تۇيەمويناق شاعىن جيناقتى باستاۋىش مەكتەبىن كورشى اۋىلداعى ءنومىرى 133-مەكتەپكە بەكىتىپ بەرگەنبىز، - دەدى جەزقازعان قالالىق ءبىلىم ءبولىمىنىڭ باسشىسى ەرجان قۇرماش ۇلى ازاتتىق تىلشىسىنە.
ماماننىڭ دەرەگىنشە، جەزقازعان قالاسىنا كىرەتىن كەڭگىرگە قاراستى تەرەكتى اۋىلىنداعى توعىز جىلدىق مەكتەپتە 5 وقۋشى، مالشىباي جانە تالاپ اۋىلىنداعى باستاۋىش مەكتەپتەردە 11 وقۋشى جانە 3 وقۋشى وقيدى.
ەرجان قۇرماش ۇلىنىڭ ايتۋىنشا، «وقۋشىلار سانى جىلدا وسىنداي از، ويتكەنى جاستاردىڭ اۋىلدا تۇراقتاۋى قيىن».
ازاتتىق تىلشىسىمەن سويلەسكەن كەڭگىر اۋىلدىق وكرۋگى باس مامانىنىڭ ايتۋىنا قاراعاندا، شالعاي ەلدىمەكەن تۇرعىندارىن ءىرى ەلدىمەكەندەرگە كوشىرۋ تۋرالى ۇكىمەت باعدارلاماسىنا قاراماستان ەسكى قونىسىنان كوشپەي قويعان حالىق بالالارىن وسىنداي شاعىن جيناقتى مەكتەپتەرگە بەرەدى.
ىبىراي التىنسارين اتىنداعى ۇلتتىق ءبىلىم اكادەمياسى قۇرامىنداعى شاعىن جيناقتى مەكتەپتەردى دامىتۋ ورتالىعىنىڭ ديرەكتورى گۇلنۇر قۇدايبەرگەننىڭ ايتۋىنشا، قازاقستانداعى 7222 ورتا مەكتەپتىڭ 3268 سى - شاعىن جيناقتى ورتا مەكتەپ (ونىڭ 765 ى - باستاۋىش شاعىن جيناقتى مەكتەپ).
- شاعىن جيناقتى مەكتەپتەردى بىرنەشە سىنىپ وقۋشىسى ءبىر كابينەتتە وقىتىلۋى مۇمكىن. باستاۋىش شاعىن جيناقتى مەكتەپتەردە ءبىلىم ساپاسى جامان بولماۋى مۇمكىن. ءبىراق ءتورتىنشى سىنىپتان كەيىن ءپان مۇعالىمدەرى جەتىسپەيدى. سوندىقتان باستاۋىش سىنىپتاردى قالدىرىپ، ورتا جانە جوعارى سىنىپ وقۋشىلارىن ينتەرناتتاردا وقىتۋ ماسەلەسى قاراستىرىلىپ جاتىر، - دەيدى ول.
گۇلنۇر قۇدايبەرگەننىڭ سوزىنە قاراعاندا شاعىن جيناقتى مەكتەپتەردىڭ دەنى - اۋىلدىق جەرلەردەگى مەكتەپتەر. ونداي مەكتەپتەردىڭ كوبى سولتۇستىك قازاقستان (444 مەكتەپ) مەن اقمولا (419 مەكتەپ) وبلىستارىندا.
قازاقستاننىڭ ء«بىلىم تۋرالى» زاڭى بويىنشا مەملەكەت تۇرعىن سانى از ەلدى مەكەندەردە تۇراتىن بالالاردىڭ باستاۋىش، نەگىزگى ورتا، جالپى ورتا ءبىلىم الۋ قۇقىقتارىن قامتاماسىز ەتۋ ءۇشىن شاعىن جيناقتى مەكتەپتەر مەن ينتەرنات ۇيىمدارىنىڭ جۇمىس ىستەۋىنە كەپىلدىك بەرگەن.
ءبىلىم جانە عىلىم مينيسترلىگىنىڭ دەرەگىنشە، بيىلعى وقۋ جىلىندا 2 ميلليون 600 مىڭ بالا مەكتەپكە بارعان. ولاردىڭ 336 مىڭى - يىركولدىك نۇربول ءنابيدۋللا سياقتى ءبىرىنشى سىنىپ وقۋشىلارى.
«ازاتتىق راديوسى»