وتكەن جىلى قازاقستان سوتتارىندا 1 ميلليوننان استام ءىس قارالدى
بۇل تۋرالى بۇگىن ق ر و ك ق- ىندە وتكەن بريفينگتە ق ر جوعارعى سوتى قىلمىستىق ىستەر جونىندەگى قاداعالاۋشى سوت القاسىنىڭ ءتوراعاسى اباي راحمەتۋلين ءمالىم ەتتى.
«بۇگىندە سوتتار ەل دامۋىنا زور ۇلەس قوسۋدا. سوتتىڭ ءرولى قۇقىقتىق ۇستەمدىكتى ساقتاۋدان كورىنۋدە. ءبىر قاراعاندا، قاراپايىم سانالاتىن وسى پرينتسيپ مەملەكەتىمىزدىڭ الەۋمەتتىك- ەكونوميكالىق جانە ساياسي دامۋىمەن تىعىز بايلانىستى» ، - دەدى ول.
كوميتەت ءتوراعاسىنىڭ اتاپ وتۋىنشە، ناقتى ءارى ورىندالاتىن زاڭى جوق ەلگە ينۆەستورلار كەلىپ، قارجى سالمايتىندىعى بەلگىلى. بۇعان قوسا، ءوز مۇددەسى مەن قۇقىعىن قورعاۋعا سەنىمدى بولماسا، بيزنەس تە دامىمايدى. ادامداردىڭ جۇمىس ىستەپ، قوزعالمايتىن مۇلىك ساتىپ الىپ، قارجى جيناقتاۋدا ەڭ باستى سەنەرى زاڭ مەن سوت بولىپ تابىلادى.
«تاۋەلسىزدىكتىڭ العاشقى كۇنىنەن باستاپ قازاقستاندا زاڭ شىعارۋشى، اتقارۋشى جانە سوت بيلىگى دەپ اتالاتىن بيلىكتىڭ ءۇش تارماعىنان تۇراتىن ساياسي جۇيە قالىپتاسقانىن اتاپ وتكەن ءجون. بۇل پرينتسيپ ەلىمىزدىڭ كونستيتۋتسياسى مەن ەگەمەندىك تۋرالى نەگىزگى بارلىق قۇجاتتارىندا ايقىن كورسەتىلگەن» ، - دەدى كوميتەت ءتوراعاسى.
ونىڭ ايتۋىنشا، بۇل زاماناۋي دەموكراتيالىق مەملەكەتكە ءتان جالپى الەمدىك تاجىريبە. بيلىكتىڭ اتالعان ءۇش تارماعى كونستيتۋتسيالىق تۇرعىدا ءتيىستى قۇزىرەتتەرگە يە جانە ءىس جۇزىندە ءبىر- بىرىنە تاۋەلسىز.
«وتكەن جىلى سوتتاردا 1 ميلليون ەكى مىڭنان استام ءىستىڭ قارالۋى ەلىمىزدەگى سوت جۇيەسى قىزمەتىنىڭ تيىمدىلىگىن كورسەتەدى. بۇل ەل ازاماتتارىنىڭ ءوز قۇقىقتارى مەن زاڭدى مۇددەلەرىن سوتتا قورعاۋعا باسىمدىق بەرەتىندىگىن بىلدىرەتىن ەڭ باستى كورسەتكىش بولىپ تابىلادى»، - دەدى ا. راحمەتۋلين.
