بولاشاقتا «قازاقستان بارىسىنىڭ» جۇلدە قورىن 1 ميلليون دوللاردان اسىرۋ جوسپارلانىپ وتىر

استانا. قازاقپارات - «قازاقستان بارىسىنىڭ» جۇلدە قورى قىسقارمايدى. بۇل تۋرالى بۇگىن وتكەن باسپا ءسوز ءماسليحاتىندا ق ر قازاق كۇرەسى فەداراتسياسىنىڭ پرەزيدەنتى ارمان شورايەۆ ءمالىم ەتتى.

«الەمدە داعدارىس بولىپ جاتقانىن بىلەسىزدەر، سوندىقتان ءبىزدىڭ دە قارجىمىزدىڭ كولەمى ءبىرشاما قىسقاردى. ءبىراق تا، ءبىز قولىمىزدان كەلگەنشە جۇلدە قورىن بۇرىنعى دەڭگەيدە ساقتاپ قالۋعا تىرىسامىز. ويتكەنى، سەرىكتەرىمىزدىڭ سانى جىل سايىن ارتۋدا جانە ولار ءتيىستى قولداۋ جاسايدى دەگەن سەنىمدەمىز»، - دەدى شورايەۆ.

ونىڭ سوزىنە قاراعاندا، داعدارىستىق جاعداي ەڭسەرىلگەننەن كەيىن، بولاشاقتا جۇلدە قورى ارتاتىن بولادى.

«داعدارىستار وتپەلى، ياعني جاقىن ارادا اياقتالار. ءبىزدىڭ جوسپارىمىز بويىنشا الداعى ون جىل ىشىندە جۇلدە قورى 1 ميلليون دوللاردان اسىپ تۇسەدى دەگەن ويدامىز»، - دەدى فەدەراتسيا باسشىسى.

بۇدان بۇرىن حابارلانعانداي، ق ر پرەزيدەنتىنىڭ جۇلدەسى ءۇشىن «قازاقستان بارىسى» تۋرنيرىنىڭ اقتىق سىنى 5- شىلدەدە ەلورداداعى «سارىارقا» رەسپۋبليكالىق ۆەلوترەگىندە وتەدى. قازىرگى كەزدە ىرىكتەۋ جارىستارىنىڭ ءبىرىنشى كەزەڭى وتكىزىلۋدە.

اۆتور: رۋسلان عابباسوۆ