قىتايدا 1 - ناۋرىزدان باستاپ ينتەرنەت پايدالانۋشىلارعا باقىلاۋ كۇشەيەدى

استانا. قازاقپارات - قىتايدا ينتەرنەت جەلىسىن پايدالانۋشىلار مەن عالامتورداعى اقپاراتتارعا باقىلاۋدى كۇشەيتپەك. بۇل تۋرالى سارسەنبى كۇنى جاريالانعان ق ح ر ينتەرنەت- اقپارات ىستەرى جونىندەگى مەملەكەتتىك كەڭسەسىنىڭ قۇجاتىندا جازىلعان.

بۇل تۋرالى ТАСС حابارلادى.

جاڭا رەتتەۋ قاعيداسىنا سايكەس، بارلىق پايدالانۋشىلار وزدەرىنىڭ شىن ەسىمدەرىن كورسەتە وتىرىپ، شاعىن بلوگتار، مەسسەندجەرلەردە جاڭا اككاۋنتتارىن تىركەۋگە مىندەتتى.

بۇدان باسقا، ينتەرنەتتە ق ح ر زاڭناماسىن بۇزاتىن، ۇلتتىق قاۋىپسىزدىك پەن ەگەمەندىكتىڭ بەدەلىنە نۇقسان كەلتىرگەن، مەملەكەتتىك بيلىككە كۇيە جاققان اقپاراتتى ورنالاستىرۋعا تىيىم سالىندى. سونداي- اق، الىپ- قاشپا اڭگىمەلەر، پورنوگرافيا، ەكسترەميزم، سەكتانتتىق شاقىرۋلار، قورلاۋ مەن عايبات سوزدەردى تاراتۋمەن اينالىساتىن پايدالانۋشىلاردىڭ ەسەپتىك جازبالارى ءماجبۇرلى وشىرىلەتىن بولادى.

بۇل شارالار 2015 - جىلعى 1 - ناۋرىزدان باستاپ كۇشىنە ەنەدى.

 قازىرگى ۋاقىتتا قىتايلىق ينتەرنەت سەكتورىندا بەلگىلى ادامدار مەن ۇيىمداردىڭ جاساندى اككاۋنتتارىن جابۋ ناۋقاندارى باستالىپ كەتتى. دۇيسەنبى 2 - اقپاندا ق ح ر ينتەرنەت- اقپارات ىستەرى جونىندەگى مەملەكەتتىك كەڭسەسى بەيجىڭدە جەرگىلىكتى ءىرى پورتالدار («سينا» /Sina/، «سوحۋ» /Sohu/، «بايدۋ» /Baidu/، «حەشيۇن» /Hexun/) وكىلدەرىنىڭ قاتىسۋىمەن جيىن وتكىزدى. ولارعا زاڭ بۇزۋشىلىققا جول بەرمەۋ قاجەتتىگى ەسكەرتىلدى.