بۋراباي كۋرورتتىق ايماعىندا جىلىنا 1 ميلليون ادام دەمالادى

استانا. قازاقپارات - بۋراباي كۋرورتتىق ايماعىن دامىتۋ جوسپارىنىڭ ەكىنشى كەزەڭى جاقسى ناتيجەلەر بەرەدى. بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە اقمولا وبلىسىنىڭ اكىمى سەرگەي كۋلاگين ءمالىم ەتتى.

«مەملەكەت باسشىسىنىڭ جولداۋىندا ەڭ باستى باعىتتاردىڭ ءبىرى رەتىندە تۋريزم ينفراقۇرىلىمىن دامىتۋ اتالىپ ءوتتى جانە بۇل تۇرعىدا ءبىزدىڭ وبلىستىڭ الەۋەتى جوعارى. وسى ورايدا وبلىستا قارجىلاندىرۋ كولەمى 47,6 ميلليارد تەڭگە سوماسىندا بۋراباي كۋرورتتىق ايماعىن دامىتۋ جوسپارىنىڭ ەكىنشى كەزەڭى جۇزەگە اسىرىلۋدا» ، - دەدى اكىم.

 ەكىنشى كەزەڭ اياسىندا 80 نەن استام ءتيىستى شارالار قامتىلىپ وتىر. 2014-2016 - جىلدارى ارالىعىندا اتالعان 47,6 ميلليارد تەڭگە يگەرىلەتىن بولادى.

«بۇل قوماقتى قارجى جانە ونىڭ كولەمى دەمالىس ورىندارىنىڭ جاعدايىن ايتارلىقتاي جاقسارتۋعا مۇمكىندىك بەرەدى. بۇگىندە جازعى كەزەڭدە بىزدە جارتى ميلليونعا جۋىق ادام دەمالۋعا كەلەدى. جالپى ءبىر جىلدا مۇندا ءبىر ميلليونعا جۋىق ادام كەلەدى» ، - دەدى س. كۋلاگين.

ونىڭ سوزىنە قاراعاندا، وڭىردە تۋريزمدى بۇدان ارى قاراي دامىتۋدىڭ كوزى رەتىندە زەرەندى، قورعالجىن جانە ساندىقتاۋدىڭ بىرەگەي تابيعي اۋماقتارى قامتىلۋدا.

 

اۆتور: رۋسلان عابباسوۆ