الاياقتىق جاسايمىن دەپ 1 ميلليون تەڭگەدەن استام ايىپپۇل تولەدى

ورال. قازاقپارات - ورال قالالىق سوتىندا قىزمەت بابىن پايدالانىپ الاياقتىق جاساعان جانە مەملەكەتتىك لاۋازىمدى اتقارۋشى ادامعا دەلدال ارقىلى پارا بەرۋگە تارتتى دەپ ايىپتالعان ادۆوكات كلارا وڭعاربايەۆاعا قاتىستى قىلمىستىق ىسكە نۇكتە قويىلدى.

ب ق و سوتىنىڭ باسپا ءسوز قىزمەتىنەن تۇسكەن مالىمەتكە قاراعاندا، الدىن الا تەرگەۋ ورگاندارىمەن ك. وڭعاربايەۆا الداۋ جانە سەنىمگە قيانات كەلتىرۋ ارقىلى سوتتا ازاماتتىق ءىستى قاراۋ كەزىندە ءوزى مۇددەسىن قورعاعان ازاماتشا ح- دان 100 مىڭ تەڭگە كولەمىندە قارجىنى جىمقىرعان دەپ ايىپتالعان. وڭعاربايەۆا اقشانى ح- دان الىپ، سۋدياعا بەرمەك بولعان.

ورال قالالىق سوتىنىڭ ۇكىمىمەن ك. وڭعاربايەۆا ق ر قىلمىستىق كودەكسىنىڭ 24-بابى 3-بولىگى، 177-بابى 1-بولىگىمەن كىنالى دەپ تانىلىپ، وعان جازا رەتىندە 700 ايلىق ەسەپتىك كورسەتكىش مولشەرىندە 1296400 تەڭگە ايىپپۇل سالىندى.

سونىمەن قاتار قىلمىستىق كودەكستىڭ 41-بابى 3-بولىگى نەگىزىندە ك. وڭعاربايەۆا 3 جىل مەرزىمگە ادۆوكاتتىق قىزمەتپەن اينالىسۋ قۇقىعىنان ايىرىلدى. ۇكىم زاڭدى كۇشىنە ەنگەن جوق.