بيىلعى قاڭتاردا قازاقستاننىڭ 19 وڭىرىندە ينفلياتسيا كۇشەيە ءتۇستى - ۇلتتىق بانك

استانا. قازاقپارات - ۇلتتىق بانكتىڭ اقشا-كرەديت ساياساتى دەپارتامەنتىنىڭ ناقتى سەكتور مونيتورينگى باسقارماسىنىڭ باستىعى يگور وسيپوۆ بيىلعى قاڭتارداعى ينفلياتسياعا نە سەبەپ بولعانىن ءتۇسىندىردى، دەپ حابارلايدى قازاقپارات.

ونىڭ ايتۋىنشا، 2023-جىلدىڭ قاڭتار ايىندا ەلدە جىلدىق ينفلياتسيا 20,7 پايىز بولىپ (2022-جىلعى جەلتوقساندا - 20,3 پايىز)، ءسال قارقىن الا ءتۇستى.

«ايماقتار بويىنشا الىپ قاراساق، ينفلياتسيانىڭ 19 وڭىردە جەدەلدەپ، 1 وڭىردە (قاراعاندى وبلىسى) باياۋلاعانىن اڭعارۋعا بولادى. جىلدىق ينفلياتسيانىڭ ەڭ جوعارى ءمانى استانا قالاسىندا جانە ماڭعىستاۋ مەن اقمولا وبلىستارىندا تىركەلدى. قاڭتاردا ازىق- تۇلىك تاۋارلارىنىڭ باعاسى ج/ج 25,7 پايىزعا (2022-جىلعى جەلتوقساندا - 25,3 پايىز) ءوستى. وسى توپتاعى تاۋارلاردىڭ باعاسى ماڭعىستاۋ وبلىسىندا (31,5 پايىز) بارىنشا تەز، ال الماتى وبلىسىندا (23,8 پايىز) مەيىلىنشە باياۋ ءوستى»، - دەيدى باسقارما باستىعى.

يگور وسيپوۆ ازىق-تۇلىككە جاتپايتىن تاۋارلار باعاسىنىڭ ءوسۋ قارقىنى ج/ج 20,2 پايىزعا دەيىن جەدەلدەگەنىن (2022-جىلعى جەلتوقساندا - 19,4 پايىز) ايتادى.

ەڭ جوعارعى ءمان استانا قالاسىندا (31,7 پايىز)، تومەنگى ءمان الماتى وبلىسىندا (15,9 پايىز) تىركەلگەن.

قاڭتاردا اقىلى قىزمەتتەردىڭ باعاسى ج/ج 14,2 پايىزعا ءوستى (2022-جىلعى جەلتوقساندا - 14,1 پايىز)، بۇل رەتتە اقمولا وبلىسىندا (18,4 پايىز) باعا جالپى رەسپۋبليكالىق دەڭگەيدەن جوعارى، الماتى وبلىسىندا (11,4 پايىز) ءبىرشاما تومەن بولدى.

2023-جىلعى قاڭتاردا ەلدە باياۋلاعان ايلىق ينفلياتسيانىڭ ءوسىمى 1,1 پايىزدى قۇرادى.

بۇل سوڭعى 5 جىلداعى (2018-2022-جىلدارى: 0,6 پايىز) قاڭتار ايىنداعى ينفلياتسيانىڭ ورتاشا مانىنەن ءبىرشاما جوعارى.