تۇركيادا ءزىلزالا قۇرباندارىنىڭ سانى 19 مىڭنان استى

انكارا. انادولى- قازاقپارات - تۇركياداعى جويقىن جەر سىلكىنىسىنىڭ سالدارىمەن كۇرەسكە 141 مىڭ ادام جۇمىلدىرىلعان، دەپ حابارلايدى قازاقپارات تۇركيانىڭ انادولى اگەنتتىگىنە سىلتەمە جاساپ.

«تابيعات اپاتى سالدارىنان 19,3 مىڭ ادام قۇربان بولدى»، دەدى تۇركيا پرەزيدەنتى رەجەپ تاييپ ەردوعان.

10 پروۆينتسياداعى اپات بولعان ايماقتاردا ىزدەستىرۋ- قۇتقارۋ جۇمىستارىنا شەتەلدەن كەلگەن قۇتقارۋشىلاردى قوسا العاندا 141 مىڭ ادام جۇمىلدىرىلعان.

تۇركيا باسشىسى ەلدىڭ وڭتۇستىگىندەگى جويقىن جەر سىلكىنىسىنىڭ سالدارىمەن كۇرەسكە ۇلەس قوسىپ جۇرگەن ازاماتتاردىڭ بارلىعىنا العىس ءبىلدىردى.

رەجەپ تاييپ ەردوعان مەملەكەتتىڭ تابيعات اپاتىنان زارداپ شەككەن ادامداردىڭ بارلىعىنا كومەكتەسۋگە دايىن ەكەنىن مالىمدەدى.

ول اپات ايماعىنداعى ەل تۇرعىندارىن ءزىلزالانىڭ سالدارىمەن كۇرەستە مەملەكەتكە سەنىم ارتۋعا شاقىردى.

تۇركيا پرەزيدەنتى اپات بولعان ايماقتان كەلگەندەردى پانالاتقاندارعا ايىنا 5 مىڭ تۇرىك ءليرى، ال باسپانانى جالعا الىپ جاتقاندارعا 2 مىڭ ءليرى تولەنەتىنىن ايتتى.

مەملەكەت باسشىسى كاحرامانماراشتان باستالعان جەر سىلكىنىسى قۇرباندارىنىڭ سانى 19388 ادامعا جەتكەنىن، سونداي- اق 77711 ادامنىڭ زارداپ شەككەنىن مالىمدەدى.