ءماجىلىس پەن ءماسليحات دەپۋتاتتارىن سايلاۋ ءبىر كۇندە 19- ناۋرىزدا وتەدى
ورتالىق سايلاۋ كوميسسياسى قاۋلى جوباسىن قابىلدادى، دەپ حابارلايدى قازاقپارات ءتىلشىسى.
«سايلاۋ تۋرالى كونستيتۋتسيالىق زاڭنىڭ نورمالارىنا سايكەس، وكىلەتتىكتەرى مەرزىمىنەن بۇرىن توقتاتىلعان ءماسليحاتتار دەپۋتاتتارىنىڭ كەزەكتەن تىس سايلاۋىن ورتالىق سايلاۋ كوميسسياسى تاعايىندايدى جانە بۇل سايلاۋ ءماسليحاتتار وكىلەتتىگى مەرزىمىنەن بۇرىن توقتاتىلعان كۇننەن باستاپ ەكى ايدان كەشىكتىرىلمەي وتكىزىلۋگە ءتيىس. وسىلايشا، ق ر پرەزيدەنتىنىڭ جارلىقتارىنا سايكەس، بۇگىنگى كۇننەن باستاپ پارلامەنت ءماجىلىسى مەن ءماسليحاتتاردىڭ دەپۋتاتتارىن سايلاۋ ناۋقانى باستالدى»، - دەدى ق ر ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ ق ر و س ك بۇگىنگى وتىرىسىندا.
ق ر «سايلاۋ تۋرالى» كونستيتۋتسيالىق زاڭىنىڭ 101-بابىنىڭ 3-تارماعىنا سايكەس، وكىلەتتىكتەرى مەرزىمىنەن بۇرىن توقتاتىلعان ءماسليحات دەپۋتاتتارىنىڭ كەزەكتەن تىس سايلاۋىن و س ك ءتوراعاسى ءتيىستى جارلىعى نەگىزىندە تاعايىندايدى.
«وسىعان بايلانىستى ءماسليحات دەپۋتاتتارىن كەزەكتەن تىس سايلاۋدى ناۋقان وتكىزۋدىڭ جەكەلەگەن ۇسىنۋ، تىركەۋ، ۇگىت جۇرگىزۋ كەزەڭدەرىن بىرىزدەندىرۋ ماقساتىندا ق ر پارلامەنتى ءماجىلىسى دەپۋتاتتارىنىڭ سايلاۋىمەن بىرگە وتكىزۋ، ياعني 19- ناۋرىزعا تاعايىنداۋ ۇسىنىلادى»، - دەدى ق ر ورتالىق سايلاۋ كوميسسياسىنىڭ مۇشەسى ءسابيلا مۇستافينا.
ن. ءابدىروۆتىڭ ايتۋىنشا، ءماسليحات دەپۋتاتتارىن سايلاۋدى ۇيىمداستىرۋ مەن وتكىزۋدى ءتيىستى اۋماقتىق سايلاۋ كوميسسيالارى قامتاماسىز ەتەدى.
ايتا كەتسەك، كەشە مەملەكەت باسشىسى جەتىنشى سايلانعان ق ر پارلامەنتىنىڭ ءماجىلىسىن تاراتۋ جانە ق ر پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويدى.
ءماجىلىس دەپۋتاتتارىن كەزەكتەن تىس سايلاۋ 19- ناۋرىزعا بەلگىلەندى.
ودان بولەك، مەملەكەت باسشىسى بارلىق دەڭگەيدەگى ءماسليحاتتاردىڭ وكىلەتتىگىن توقتاتۋ تۋرالى جارلىققا قول قويدى.
مەملەكەت باسشىسى قاسىم-جومارت توقايەۆ پارلامەنت ءماجىلىسى جانە ءماسليحات دەپۋتاتتارىنىڭ كەزەكتەن تىس سايلاۋىن تاعايىنداۋ تۋرالى مالىمدەمە جاسادى.
