پەتروپاۆل تۇرعىنى گاراجىنان 19-عاسىردىڭ مىلتىعىن تاۋىپ الدى - فوتو

None
پەتروپاۆل. قازاقپارات - پەتروپاۆل تۇرعىنى گاراجىن قوقىستان تازارتىپ ءجۇرىپ، سيرەك كەزدەسەتىن قارۋدى تاپتى. شەتەلدە شىعارىلعان قارۋ ەندى پوليتسيا دەپارتامەنتىنىڭ مۋزەيىنە تاپسىرىلماق، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆل قالاسىنىڭ پوليتسيا باسقارماسىنا 58 جاستاعى قالا تۇرعىنى حابارلاسقان. ول ءتارتىپ ساقشىلارىنا پايدالانىلمايتىن گاراجىن قوقىستان تازارتىپ ءجۇرىپ قوس ۇڭعىلى مىلتىق سالىنعان قاپشىق تاۋىپ العانىن ايتتى. ەر ادام ءتىسقاققان اڭشى، قارۋ-جاراق ۇستاۋعا رۇقساتى بار بولعاندىقتان زاڭسىز ساقتالعان قارۋ ءۇشىن جاۋاپكەرشىلىكتىڭ بارلىعىن جاقسى بىلەدى. سوندىقتان تابىلعان قارۋ تۋرالى بىردەن پوليتسياعا حابارلاعان. ەر ادام قارۋدى ەرىكتى تۇردە تاپسىردى. تابىلعان مىلتىق زەرتتەۋگە جىبەرىلدى.

س ق و پ د جەدەل-كريميناليستيكالىق باسقارماسىنىڭ قىزمەتكەرلەرى ونىڭ وق اتۋعا جارامدى اتىس قارۋى ەكەنىن راستادى. ءبىر قىزىعى، بۇل مىلتىق بەلگيالىق «Bayard» فيرماسىنىڭ سيرەك كەزدەسەتىن اڭشى قارۋى بولىپ شىقتى. مىلتىققا ويىلىپ جازىلعان بەلگىلەرىنەن كريميناليستەر ونىڭ 1893-1898 -جىلدار ارالىعىندا شىعارىلعان دەگەن بولجامعا كەلدى. ەندى سيرەك كەزدەسەتىن قارۋ وبلىستىق پوليتسيا دەپارتامەنتىنىڭ مۋزەيىنە تاپسىرىلماق.

«تۇرعىندار تىركەلمەگەن قارۋدى ەرىكتى تۇردە تاپسىرعان جاعدايدا عانا قىلمىستىق جانە اكىمشىلىك جاۋاپكەرشىلىكتەن بوساتىلادى. وتكەن جىلى وبلىس اۋماعىندا زاڭسىز اينالىمنان 128 تىركەلمەگەن اتىس قارۋى الىندى، ونىڭ 17 ى پەتروپاۆلدا بولعان»، - دەيدى س ق و پ د اكىمشىلىك پوليتسيا باسقارماسىنىڭ باستىعى سەرىك ءالجانوۆ.


سوڭعى جاڭالىقتار