قورداي وقيعاسى: 19 پوليتسيا قىزمەتكەرى زارداپ شەكتى
8-اقپاندا قاقتىعىستىڭ الدىن الۋ جانە ونى وقشاۋلاۋ ءۇشىن وقيعا ورىندارىنا العاشقىلاردىڭ ءبىرى بولىپ جامبىل جانە الماتى وبلىسى پوليتسيا دەپارتامەنتىنىڭ جەدەل ارەكەت ەتۋ ارنايى جاساعىنىڭ قىزمەتكەرلەرى كەلدى.
تارتىپسىزدىك كەزىندە 19 قىزمەتكەر ءتۇرلى دەنە جاراقاتىن العان، 9 ى- اتىس كەزىندە جاراقاتتانعانى بەلگىلى بولدى. ارنايى جاساق ينسپەكتورلارىنىڭ ءبىرىنىڭ بەتى مەن سول اياعىنا وق تيگەن. تاعى ءبىر جاساق ينسپەكتورى - ەكى ساننىڭ جوعارعى جارتىسىنان جاراقات الدى. جاعداي تۇراقتالىپ، پوليتسەيلەر باقىلاۋعا العاننان كەيىن، قىزمەتكەرلەر ورتالىق اۋداندىق اۋرۋحانانىڭ قىزمەتىنە جۇگىندى.
قورعانىس قۇرالدارى مەن وق وتكىزبەيتىن ارنايى كيىمدەردىڭ (برونەجيلەت) ارقاسىندا قاقتىعىس كەزىندە العان جاراقاتتار ساناتى ادام ومىرىنە اسا قاۋىپتى ەمەس ەكەنى انىقتالدى. زارداپ شەككەندەردىڭ كوپشىلىگى العاشقى مەديتسينالىق كومەك العاننان كەيىن قاتارعا قوسىلىپ، قىزمەتتەرىن جالعاستىرۋدا.
الماتى وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى سەرىك جۇنىسبەكوۆ جاراقات العانداردىڭ قاتارىندا. وعان جاسالعان وپەراتسيا ءساتتى شىعىپ، قازىرگى ۋاقىتتا دەنساۋلىعىنا قاۋىپ ءتونىپ تۇرعان جوق. قىلمىستىق كودەكستىڭ 380-بابى (بيلىك وكىلىنە قاتىستى كۇش قولدانۋ) بويىنشا سوتقا دەيىنگى تەرگەۋ جۇرگىزىلۋدە .
ەسكە سالايىق، 7- اقپان كۇنى جامبىل وبلىسىنىڭ قورداي اۋدانىنداعى ماسانچي اۋىلىنىڭ تۇرعىندارى اراسىندا جاپپاي توبەلەس بولدى. ق ر پرەزيدەنتى قاسىم-جومارت توقايەۆ بۇزاقىلىق سيپاتتاعى جاپپاي توبەلەستى ارانداتۋشىلار ءوز پايداسىنا قولدانباق بولعانىن مالىمدەدى.
سونداي-اق ۆيتسە-پرەمەر بەردىبەك ساپاربايەۆتىڭ توراعالىعىمەن ۇكىمەتتىك كوميسسيا قۇرىلاتىنىن، قازا بولعانداردى جەرلەۋ، زارداپ شەككەندەرگە كومەكتەسۋ جۇمىستارى ۇيىمداستىرىلاتىنىن، قوعامدىق ءتارتىپتى بۇزعاندار انىقتالىپ، قاتاڭ جاۋاپقا تارتىلاتىنىن ءمالىم ەتتى. باس پروكۋراتۋراعا، ۇلتتىق قاۋىپسىزدىك كوميتەتىنە ءتيىستى تاپسىرما بەرىلدى.
