رەسپۋبليكالىق بيۋدجەتكە 19 ميلليارد تەڭگە ارتىق كىرىس ءتۇستى
بۇل تۋرالى بۇگىن ۇكىمەت وتىرىسىندا 2019 -جىلدىڭ 4 ايىنداعى مەملەكەت بيۋدجەتىنىڭ اتقارىلۋ قورىتىندىسى تۋرالى بايانداعان ق ر پرەمەر- ءمينيسترىنىڭ ورىنباسارى - قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«مەملەكەتتىك بيۋدجەتتىڭ كىرىستەرى ەسەپتى كەزەڭنىڭ جوسپارىنا قاراعاندا - 103,9، ولاردىڭ ىشىندە رەسپۋبليكالىق كىرىستەر - 100,9، جەرگىلىكتى بيۋدجەتتەر 113,5 پايىزعا اسىرا ورىندالدى. رەسپۋبليكالىق بيۋدجەتكە 2 127 ميلليارد تەڭگە كىرىس ءتۇستى. بۇل جوسپاردان 19 ميلليارد تەڭگەگە، ال بىلتىرعى جىلدىڭ ءتورت ايىنىڭ كورسەتكىشىنەن 345 ميلليارد تەڭگەگە ارتىق. ءوسۋ قارقىنى - 119,4 پايىز. ارتىق ورىندالۋ سوماسى نەگىزىنەن سالىقتىق ەمەس تۇسىمدەر - 13 ملرد تەڭگە. ولاردىڭ ىشىندە 4,1 ميلليارد تەڭگە مەملەكەتتىك مەنشىكتەن تۇسكەن كىرىستەرگە، 7,4 ميلليارد تەڭگە ايىپپۇلدارعا، وسىمدەرگە تيەسىلى. ال سالىقتار 4,3 ميلليارد تەڭگەگە اسىرا ورىندالدى»، - دەدى ءا. سمايىلوۆ.
ونىڭ دەرەگىنشە، ەلىمىزدە وندىرىلەتىن تاۋارلارعا سالىناتىن قوسىمشا قۇن سالىعى جوسپاردان - 15 ميلليارد تەڭگەگە، تابيعي جانە باسقا دا رەسۋرستاردى پايدالانعانى ءۇشىن تۇسەتىن تۇسىمدەر - 6,5 ميلليارد تەڭگەگە، حالىقارالىق ساۋدا مەن سىرتقى وپەراتسيالارعا سالىناتىن سالىقتار 17 ميلليارد تەڭگەگە ارتىق ورىندالدى. ءبىراق، كورپوراتيۆتىك تابىس سالىعى - 17 ميلليارد تەڭگەگە، يمپورتقا سالىناتىن قوسىمشا قۇن سالىعى 21 ميلليارد تەڭگەگە ورىندالمادى. كورپوراتيۆتىك تابىس سالىعىنىڭ جوسپارىنىڭ ورىندالماۋىنا ءالى دە بولسا ەكىنشى دەڭگەيدەگى بانكتەردىڭ تابىستارىنىڭ تومەندەۋى، بانكروتتىققا ۇشىراۋى، ليسەنزيالاردى كەرى قايتارىپ الۋى سەبەپ بولىپ وتىر. مۇنان بولەك، ۋران جانە تاۋ- كەن ءوندىرۋشى كومپانيالاردىڭ وتكىزۋ بويىنشا اينالىمدارىنىڭ، تابىستارىنىڭ تومەندەۋى دە اسەر ەتتى.
«جەرگىلىكتى بيۋدجەتتەردىڭ ءوز كىرىستەرى 91 ميلليارد تەڭگەگە ارتىعىمەن ورىندالىپ، 761 ميلليارد تەڭگەنى قۇرادى. اسىرا ورىندالۋ سوماسىنىڭ 74 ميلليارد تەڭگەسى جەرگىلىكتى سالىقتارعا كەلەدى. ماڭعىستاۋ وبلىسى مەن شىمكەنت قالاسىندا كىرىستەردىڭ جوسپارى ورىندالمادى. قالعان وڭىرلەردە كىرىستەردىڭ جوسپارى ارتىعىمەن ورىندالدى. ولاردىڭ ەڭ ءىرى سومالارى الماتى قالاسىندا جانە اتىراۋ وبلىسىندا قالىپتاستى»، - دەدى ول.
اۆتور: مارلان جيەمباي