رەسەيدە 19- بۇكىلالەمدىك جاستار مەن ستۋدەنتتەر فەستيۆالى ءوتىپ جاتىر

استانا. قازاقپارات - بۇگىن سوچي قالاسىندا اشىلعان XIX بۇكىل الەمدىك جاستار مەن ستۋدەنتتەر فەستيۆالىنىڭ (ب ج س ف) باستى تاقىرىبى الەمنىڭ بولاشاعىن قۇرۋ بولماق. فەستيۆالگە الەمنىڭ 180 ەلىنەن 20 مىڭنان استام جاستار قاتىسادى، دەپ حابارلايدى قازاقپارات رەسەيلىك تاسس اگەنتتىگىنە سىلتەمە جاساپ.

XIX بۇكىلالەمدىك جاستار مەن ستۋدەنتتەر فەستيۆالىنىڭ پرەزيدەنتى (ب ج س ف) نيكولاس پاپاديميتريۋ فەستيۆال جاستارعا سەنىم مەن جىگەر بەرەدى دەگەن سەنىمىن ءبىلدىردى. شارانى ۇيىمداستىرۋشىلار باسىندا فەستيۆالگە 20 مىڭ ادام قاتىسادى، ونىڭ تەڭ جارتىسى رەسەيلىكتەر ال قالعانى الەمنىڭ 180 ەلىنەن كەلگەن شەتەلدىك قوناقتار بولادى دەپ ءمالىم ەتتى، الايدا سەنبى كۇنى فەستيۆالدىڭ باسپا ءسوز قىزمەتى فورۋمعا ادامنىڭ جوسپارلانعان مولشەردەن كوپ كەلگەنىن اتاپ ءوتتى. فەستيۆالدىڭ قوناقتارى مەن سپيكەرلەرىنىڭ ءتىزىمى دە از ەمەس. الەمنىڭ جاستارىمەن رەسەيلىك ساياساتكەرلەر مەن مينيسترلەر، تانىمال قوعام جانە مادەنيەت قايراتكەرلەرى، ءدىني ۇيىمداردىڭ وكىلدەرى كەزدەسەدى.

شەتەلدىك قۇرمەتتى قوناقتار قاتارى دا كوپ. اتاپ ايتار بولساق، حالىقارالىق فۋتبول فەدەراتسياسىنىڭ باس حاتشىسى (ف ي ف ا) فاتما سامۋرا، موتيۆاتسيا بەرۋشى شەشەن نيك ۆۋيچيچ، كينورەجيسسەر كلود لەلۋش، مۋزىكانت ميشەل لەگران، Google-دىڭ دامۋشى نارىقتار بويىنشا GR- ديرەكتورى دورون اۆني، سونداي-اق بۇكىلالەمدىك جابايى حايۋاناتتار قورىنىڭ باس ديرەكتورى (WWF) ماركو لامبەرتيني كەلگەن.

بۇكىلالەمدىك جاستار مەن ستۋدەنتتەر فەستيۆالى فەستيۆالدىك قوزعالىستىڭ كوپجىلدىق داستۇرىنە سايكەس، كۇن سايىن عالامشارىمىزدىڭ ءبىر ايماعىنا: امەريكا، تاياۋ شىعىس، ازيا جانە مۇحيت ارالدارى، ەۋروپاعا ارنالاتىن بولادى. 21 -قازاندا فەستيۆالدە رەسەي كۇنى جوسپارلانعان.

فەستيۆالدىڭ تالقىلاۋ باعدارلاماسى 12 جاھاندىق تاقىرىپتى قامتيدى: «بولاشاقتىڭ عىلىمى جانە جاھاندىق ءبىلىم بەرۋ»، «بولاشاقتى جوبالاۋ: ساۋلەت جانە ديزاين»، «بولاشاق تەحنولوگيالارى»، «ەكولوگيا جانە دەنساۋلىق»، «حالىقارالىق مادەني كەڭىستىك»، «بولاشاق اۆياتسياسى»، «جاھاندىق ساياسات جانە ونىڭ كۇن ءتارتىبى: الەمدى قالاي قورعاۋ كەرەك»، «بولاشاقتى دامىتۋ ەكونوميكاسى»، «دۇنيەجۇزىلىك تەمىرجول جەلىسى: بولاشاققا جاقىنداي وتىرىپ»، سونداي-اق «جاڭا مەديا» جانە «ازاماتتىق دامۋ پلاتفورماسى».

فەستيۆال ۇيىمداستىرۋشىلارى جيىرماعا جۋىق سپورت الاڭدارىن ۇسىنادى. ولاردىڭ اراسىندا جىبەك جولى راللي- مارافونىنىڭ، كوشە باسكەتبولىنىڭ، ۆوركۋتانىڭ، ءبي سپورتىنىڭ، اكروباتيكالىق روك- ن- روللدىڭ، ۇلتتىق سپورت تۇرلەرى مەن ەكسترەمالدى سپورت تۇرلەرىنىڭ ينتەراكتيۆتى ايماقتارى بار.

بۇدان باسقا، كونكي تەبۋ جانە حوككەي مەن مانەرلەپ سىرعاناۋ ءۇشىن الاڭدار، جاۋىنگەرلىك ونەر كورسەتۋ ايماعى جاساقتالادى.

كەڭ اۋقىمدى باعدارلاما 2018 -جىلى رەسەيدە وتەتىن الەم كۋبوگىنا ارنالادى. ب ج س ف نەگىزگى وقيعالارى سوچيدەگى وليمپيادالىق پاركتىڭ اۋماعىندا ۇيىمداستىرىلادى. باستى مەديا- ورتالىق اۋماعىندا پىكىرتالاستار، عىلىمي جانە ءبىلىم بەرۋ باعدارلامالارى، «YOUTH EXPO» جاستاردىڭ جەتىستىكتەر كورمەسى وتەدى جانە كينوفيلمدەر كورسەتىلەدى.

ەسكە سالا كەتسەك، بۇدان بۇرىن بجسف ماسكەۋدە 1957 -جىلى جانە 1985 -جىلى ەكى رەت وتكەن بولاتىن.

XIX بۇكىلالەمدىك جاستار مەن ستۋدەنتتەر فەستيۆالى ماسكەۋدە 14 -قازاندا باستالدى. فەستيۆالدىڭ نەگىزگى وقيعالارى 15-22 -قازاندا سوچيدەگى وليمپيادا پاركىندە وتەدى.

فورۋمدا 180 ەلدەن كەلگەن 18-35 جاس ارالىعىنداعى ءتۇرلى سالالاردىڭ بيىك شىڭدارىن باعىندىرىپ جۇرگەن جاس كاسىپقويلار باس قوسادى. فەستيۆالدى وتكىزۋگە 5 مىڭنان استام ەرىكتى كومەك كورسەتىپ جاتىر.