20:17, 18 - تامىز 2017 | GMT +6
ادام ولتىرگەن ورال تۇرعىنى 19 جىلدان كەيىن رەسەيدە ۇستالدى
ورال. قازاقپارات - اسا قاتىگەزدىكپەن كىسى ولتىرگەنى ءۇشىن 1998-جىلدان بەرى حالىقارالىق ىزدەۋدە بولعان ورالدىق تۇرعىن رەسەيدەن ەكستراديتسيالاندى، دەپ حابارلايدى «قازاقپارات» ءتىلشىسى.
بۇعان باتىس قازاقستان وبلىسى پروكۋراتۋراسىنىڭ ق ر باس پروكۋراتۋراسى ارقىلى ىزدەستىرۋى جانە رەسەي فەدەراتسياسى باس پروكۋراتۋراسىنىڭ بەلسەندى كومەگى ارقاسىندا قول جەتكىزىلدى.
ب ق و پروكۋراتۋراسىنىڭ باسپا ءسوز قىزمەتىنەن تۇسكەن مالىمەتكە قاراعاندا، 1998-جىلى 23-قاراشادا ايىپتالۋشى جابىرلەنۋشىمەن بىرگە اراق ىشكەن.
ول ورنىنان تۇرىپ، كەتپەك بولعان جابىرلەنۋشىگە اياق-قولىن بىردەي جۇمساپ، دەنەسىنىڭ ءار جەرىنە سوققى كەلتىرگەن. سالدارىنان ول ەسىنەن تانىپ قالعان. ەسىن جيعان كەزدە ونىڭ بەتىنە ىستىق سۋ قۇيىپ، قيناپ، اقىرى تۇنشىقتىرىپ ولتىرگەن.
كەيىن كۇدىكتى باس ساۋعالاپ، رەسەي اۋماعىندا تىعىلىپ جۇرگەن. قازىرگى كەزدە كىنالىنى قىلمىستىق جاۋاپكەرشىلىككە تارتۋ ءۇشىن قاجەتتى تەرگەۋ امالدارى جۇرگىزىلۋدە.