بالالار ءۇيى ورتەنىپ، 19 جاس ءوسپىرىم جانىپ كەتتى

استانا. قازاقپارات - گۆاتەمالا استاناسىنان 25 شاقىرىم جەردە ورنالاسقان بالالاردى وڭالتۋ ورتالىعىندا ءورت بولىپ، 19 جاس ءوسپىرىم ءتىلسىز جاۋدىڭ قۇربانى بولدى.

تاعى 25 ادامدى كۇيىك شالعان جانە ءتۇرلى جاراقات العان، دەپ حابارلايدى BBC.

ازىرگە ءورتتىڭ نەدەن شىققانى بەلگىسىز. ءبىراق وفيتسەرلەردىڭ ءبىرى جالىن ماتراستاردى ورتەگەننەن تاراعان دەگەن مالىمەت بەرگەن. وڭالتۋ ورتالىعىندا وتباسىندا زورلىق-زومبىلىق كورگەن، قاراۋسىز قالعان، ادام ساۋداسىنىڭ قۇربانى بولعان 18 جاسقا دەيىنگى بالالار تاربيەلەنەدى.

وقيعا بولار الدىندا ورتالىقتا شەرۋ بولىپ، 60 بالا قاشىپ كەتكەن ەكەن. ولار دورەكى قارىم-قاتىناس پەن ءومىر ءسۇرۋ جاعدايىنىڭ ناشارلىعىنا شاعىمدانعان. بولعان جاعدايعا پوليتسيا ارالاسۋىنا تۋرا كەلگەن.

كەي دەرەكتەر بويىنشا وندا بالالار جىنىستىق زومبىلىق كورگەن بولۋى مۇمكىن. ورتالىق 400 بالاعا شاقتالعان، الايدا وندا بولعان بالالار سانى بۇل كورسەتكىشتەن الدە قايدا كوپ بولعان.