گەرمانيانىڭ جاڭا سايلانعان پرەزيدەنتىن ۇلىقتاۋ ءراسىمى 19- ناۋرىزدا وتەدى
ايتا كەتەيىك، كەشە فەدەرالدى جيىن مۇشەلەرىنىڭ باسىم بولىگى وعان داۋىس بەردى.
فرانك-ۆالتەر شتاينمايەر گەرمانيانىڭ 12-پرەزيدەنتى اتاندى. الداعى 5 جىلدا ونىڭ جۇمىس ورنى بەلۆيۋ سارايىندا وتەدى. ءبىراق رەسمي تۇردە قىزمەتىنە 19- ناۋرىزدا وتەتىن ۇلىقتاۋ راسىمىنەن سوڭ كىرىسەدى، دەپ حابارلايدى 24.kz.
جاڭا سايلانعان باسشى كەشەدەن بەرى ۇكىمەت پەن مەملەكەت باسشىلارىنان قۇتتىقتاۋ الىپ جاتىر. جالپى، ساياسي دودادا بەس ۇمىتكەر سىنعا تۇسكەن بولاتىن. شتاينمايەر 931 داۋىس جيناپ، ءبىرىنشى كەزەڭدە-اق ءوز قارسىلاستارىنان وق بويى وزىپ كەتتى.
«ماعان سەنىم ارتىپ، داۋىس بەرگەن حالىققا العىسىمدى بىلدىرەمىن. ال وزگە كانديداتتى تاڭداعان ازاماتتارعا بەرەتىن بولەك ۋادەم بار. مەن الداعى ۋاقىتتا بارلىق دەموكراتيالىق پارتيامەن، كواليتسيا جانە وپوزيتسيا وكىلدەرىمەن جۇمىس ىستەپ، سەنىمدەرىن اقتاۋعا بار كۇشىمدى سالامىن. حانىمدار مەن مىرزالار، ءبىز اۋمالى-توكپەلى زاماندا ءومىر ءسۇرىپ جاتىرمىز. ءبىز ءبارىمىزدى بىرىكتىرەتىن دۇنيە تابۋىمىز كەرەك»، - دەدى گەرمانيا پرەزيدەنتى فرانك-ۆالتەر شتاينمايەر.
قورىتىندى شىقپاي تۇرىپ كوپتەگەن ساراپشى شتاينمايەردىڭ جەڭىسىن بولجادى. سوندىقتان سايلاۋ كەزىندە ۇلكەن شۋ بولعان جوق. «بيلد» باسىلىمى حالىق اراسىندا ساۋالناما دا جۇرگىزىپ كوردى. نەمىس حالقىنىڭ %59 ى فرانك-ۆالتەر شتاينمايەر جاقسى پرەزيدەنت بولادى دەپ سەنەدى. بۇعان ءتىپتى گەرمانيانىڭ كانتسلەرى انگەلا مەركەل دە سەنىمدى.
«شتاينمايەر گەرمانيانى قيىن كەزەڭدە باسقارادى. مەن وعان سەنەمىن. مەن ونى كوپتەن بەرى بىلەمىن جانە ءبىز بىرگە كوپ جىل جۇمىس ىستەدىك. ول قيىن جاعدايلاردا ءاردايىم دۇرىس شەشىم قابىلدادى. ونىڭ جاقسى پرەزيدەنت بولاتىنىنا كۇمانىم جوق. كوپشىلىك قاۋىم جانە كوپتەگەن ەل ازاماتى ونى پرەزيدەنت رەتىندە قابىلدايتىنىن مەن جاقسى بىلەم.
61 جاستاعى فرانك-ۆالتەر شتاينمايەر - گەرمانيانىڭ ەڭ اتاقتى ساياساتكەرلەرىنىڭ ءبىرى. ءار جىلدارى ۆيتسە-كانتسلەردىڭ لاۋازىمىن اتقارىپ، فەدەرالدىق كانتسلەر ۇيىمىن باسقاردى. 2013-جىلدان باستاپ گەرمانيانىڭ سىرتقى ىستەر ءمينيسترى بولدى.
ساراپشىلاردىڭ ايتۋىنشا، شتاينمايەردىڭ ساياساتتا دا، ديپلوماتيادا دا تاجىريبەسى مول. سوندىقتان ول وزگەرىستەر مەن قاۋىپ-قاتەرلەر كەزەڭىندە گەرمانيا ءۇشىن تەپە-تەڭدىك پەن تۇراقتىلىقتى ساقتاي الادى»، - دەدى گەرمانيا كانتسلەرى انگەلا مەركەل.
