قىزىلوردادا اراعا 19 جىل سالىپ وتكەن مالشىلار سلەتىندە ۇمىتىلعان ءداستۇر جاڭعىردى - فوتو

  قىزىلوردا. قازاقپارات -  قىزىلوردا وبلىسى جاڭاقورعان اۋدانى قاقپا جايلاۋىندا كوپتەن كۇتكەن ءبىرىنشى وبلىستىق مالشىلار سلەتى ءوتتى.

 تالاي جىلدان بەرى ۇمىت بولا باستاعان بۇل سلەت سوڭعى رەت سىر وڭىرىندە 1996 - جىلى ۇيىمداستىرىلعان بولاتىن. بۇگىنگى ەڭبەك مەرەكەسىنە ەلىمىزدىڭ تۇكپىر- تۇكپىرىنەن اتا كاسىپتى تىرشىلىگىنىڭ وزەگىنە اينالدىرىپ وتىرعان مىڭداعان شارۋالار قاتىستى.

 ەكى كۇنگە سوزىلعان اۋقىمدى شارادا شارۋالار ارنايى ۇيىمداستىرىلعان كورمەدە تالاي جىلعى ەڭبەكتەرىن تانىستىردى. بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

سلەتكە ارنايى كەلگەن ق ر اۋىل شارۋاشىلىعى ۆيتسە- ءمينيسترى ساپارحان وماروۆ مالشىلار سلەتىن ەگەمەندىك العالى العاشقى بولىپ قىزىلوردا وبلىسى وتكىزىپ وتىرعانىن ايتىپ، مۇنداي يگى ءىس مال شارۋاشىلىعىن وركەندەتۋگە سەپتىگىن تيگىزەتىنىنە سەنىم ءبىلدىردى.

ەلىمىزدە مال شارۋاشىلىعىن دامىتۋعا باعىتتالعان بىرنەشە مەملەكەتتىك باعدارلامالار بار. ونىڭ يگىلىگىن شارۋالار كورىپ وتىرعاندىعىنا كۋامىز. ايتىپ ءوتۋ كەرەك، قىزىلوردا وبلىسى قازىر «سىباعا» باعدارلاماسىن ءتيىمدى جۇزەگە اسىرىپ وتىرعان ايماقتاردىڭ كوشىن باستاپ تۇر، - دەدى ۆيتسە- مينيستر.

 وڭىردە اتا كاسىپتى قولعا الىپ، بۇگىندە تابىستى ەڭبەك ەتىپ وتىرعان شارۋالار از ەمەس. ولاردىڭ ايماقتىڭ ءال- اۋحاتىن كوتەرۋدە وزىندىك ۇلەسى بارى دا شىندىق. بۇگىن اۋىل شارۋاشىلىعىنىڭ ءار سالاسىندا ەڭبەك ەتىپ جۇرگەن ءبىر توپ شارۋالار ماراپاتتالدى. وبلىس اكىمى قىرىمبەك كوشەربايەۆ ۇزدىكتەردى قۇتتىقتاپ، سىي- سياپاتىن كورسەتتى.

- قازىر وبلىستا ءىرى قارا، جىلقى جانە تۇيە باسىنىڭ سانى ەڭ بەرەكەلى 90- جىلعى دەڭگەيدەن اسىپ ءتۇستى، ال قويدىڭ سانى جاقسى قارقىنمەن وسۋدە. وسىعان سايكەس، 100 توننا ءىرى قارا مال ەتىن ەكسپورتتاۋ جونىندە اۋىل شارۋاشىلىعى مينيسترلىگىمەن مەموراندۋمعا قول قويىلدى، - دەدى وبلىس اكىمى

 ايتا كەتەيىك، بيىل وبلىستا قۋاتى جىلىنا 7 مىڭ توننا توقتى ەتىن وڭدەيتىن ەت كومبيناتىن جانە ءىرى مال بورداقىلاۋ الاڭدارىن سالۋ جۇمىستارى قولعا الىندى. سونداي- اق، «سىباعا» ، «قۇلان» مەن «التىن اسىق» باعدارلامالارى بويىنشا ايماق رەسپۋبليكادا الدىڭعى قاتاردا.

مالشىلار سلەتى ناعىز ەڭبەككەرلەردىڭ تويىنا ۇلاستى. 50 گە جۋىق كيىز ءۇي تىگىلىپ، ۇلتتىق ءداستۇر ۇلىقتالىپ، ۇمىت بولعان سالتتار قايتا جاڭعىردى. رەسمي شارادان سوڭ قىز قۋۋ، اۋدارىسپاق، تەڭگە ءىلۋ مەن قول كۇرەسى جانە ارقان تارتۋ سياقتى ۇلتتىق ويىنداردان جارىستار ۇيىمداستىرىلدى. سونىمەن قاتار، وبلىس پالۋاندارى ءوزارا باق سىناسىپ، تويدىڭ كوركىن كەلتىردى. مۇنان سوڭ ەڭبەككەرلەر مەرەكەسى كونسەرتتىك باعدارلاماعا ۇلاستى.