سولتۇستىك قازاقستان وبلىسىنىڭ تۇرعىندارى 19 ميلليون تەڭگەنىڭ قارۋىن تاپسىردى

پەتروپاۆل. قازاقپارات - رەسپۋبليكالىق اكسيا اياسىندا سولتۇستىك قازاقستان وبلىسىنىڭ تۇرعىندارى 19 ميلليوننان استام تەڭگەگە قارۋ تاپسىردى، دەپ حابارلادى س ق و ءى ءى د-ءنىڭ باسپا ءسوز قىزمەتىنەن.

«2014-جىلدىڭ 21- ساۋىرىندە اكسيا باستالعالى سولتۇستىك قازاقستان وبلىسىنىڭ ىشكى ىستەر ورگاندارىنا 518 ازاماتتان ءوتىنىش تۇسكەن. ولار 586 قارۋ-جاراق پەن 7 مىڭنان استام وق-ءدارىنى تاپسىرعان. قازىر س ق و ءى ءى د كوميسسيالارى 19 ميلليون 310 مىڭ تەڭگە تولەۋ جونىندە شەشىم قابىلدادى. ونىڭ 15 ميلليون تەڭگەسى ازاماتتارعا تولەندى»، - دەپ كورسەتىلگەن حابارلامادا.

سونىمەن بىرگە س ق و تۇرعىندارى 47 ءيىر ويىقتى مىلتىق، ەكى گراناتا مەن ءبىر اۆتومات تاپسىرعان.