11:34, 02 - شىلدە 2014 | GMT +5
ەكىباستۇز ساقشىلارى 19 بالانىڭ ءومىرى ءۇشىن ءوز باستارىن تاۋەكەلگە تىكتى
پاۆلودار. قازاقپارات - ەكىباستۇز ءى ءى ب جول- پاترۋلدىك قىزمەتىنىڭ روتا پوليتسەيلەرى س. زاكىروۆ پەن ك. بايسوۆ بالالاردى پاۆلوداردان ەكىباستۇزعا جەتكىزبەك بولعان اۆتوبۋسپەن بىرگە قاۋىپسىزدىك ءۇشىن ىلەسىپ شىقتى. ونىسى بەكەر بولماعان ەكەن.

ءى ءى د باسپاءسوز قىزمەتىنىڭ مالىمەتىنشە، قالاعا كىرە بەرىستەگى «گورود- ستەللا» تاس جولىندا قاتتى جىلدامدىقپەن كەلە جاتقان «Honda» كولىگى قارسى جولاققا شىعىپ كەتىپ، بالالارعا قاۋىپ ءتوندىردى. اۆتوپاترۋل ەكيپاجى جۇيتكىپ كەلە جاتقان «Honda» - نىڭ الدىنا ءوز كولىكتەرىن توسىپ، بالالاردى ءبىر اجالدان قۇتقارىپ قالدى.
وقيعا سالدارىنان پاترۋلدىك كولىك جۇرگىزۋشىسى پوليتسيا ستارشيناسى زاكىروۆ ءتۇرلى جاراقاتتارمەن اۋرۋحاناعا ءتۇستى. ءتيىستى مەديتسينالىق كومەك كورسەتىلگەن سوڭ ول ۇيىنە جىبەرىلدى.
اۆتوبۋستا بولعان 19 بالانىڭ ءبارى دە ءدىن امان.
40 جاستاعى «Honda» جۇرگىزۋشىسىنە قاتىستى اكىمشىلىك ءىس قوزعالدى.