دۇنيە ءجۇزى بويىنشا 1999-جىلدان بەرى ىزدەۋدە بولعان قازاقستاندىق قىلمىسكەر ۇستالدى
ەر ادامدى ينتەرپول جانە رەسەي ءى ءى م كولونيادان قاشىپ كەتكەننەن كەيىن ىزدەگەن. پاۆليۋك وسى ۋاقىت ارالىعىندا بىرنەشە ەلدە بولعان، ءتىپتى سولتۇستىك قازاقستاندا باسقا بىرەۋدىڭ اتىمەن ءومىر سۇرگەنى بەلگىلى بولدى.
پاۆليۋك 1974-جىلى سولتۇستىك قازاقستان وبلىسى بەسكول اۋىلىندا تۋعان. ەسەيگەن كەزىندە رەسەيگە كەتىپ قالعان. 90-جىلدارى ەر ادام قىلمىس الەمىنە تاپ بولعان.
20 جاسىندا نيكولاي قاراقشى بولعان جانە 1994-جىلى توناۋ ىسىنە قاتىسقان. سەرىكتەستەرىمەن بىرگە پاۆليۋك روستوۆ تۇرعىندارىنىڭ ءبىرىنىڭ پاتەرىنە باسىپ كىرىپ، ولاردان 100 ميلليون رۋبل، جازعى كوتتەدج جانە كاماز كولىگىن تالاپ ەتكەن. ەر ادامدى ۇرىپ-سوعىپ، تەلەديدار، ماگنيتوفون، زەرگەرلىك بۇيىمدار، قىمبات ءاتىر، اياق كيىم مەن كيىم ۇرلاپ كەتكەن.
پاۆليۋك 1995-جىلى سوتتى بولعان. ەر ادام سەگىز جىلعا باس بوستاندىعىنان ايىرىلعان بولاتىن. 1999-جىلدىڭ شىلدەسىندە پاۆليۋك كراسنودار ولكەسىندەگى حادىجەنسك قالاسىنداعى ي ك-9 كالونياسىنان ەكى سىبايلاسىمەن بىرگە قاشىپ كەتكەن. كەيبىر دەرەك بويىنشا، قىلمىسكەرلەر 300 مىڭ دوللار الىپ كەتكەن.
التى ايدان كەيىن ەكى قاشقىن ادىگەيادا ۇستالعانىمەن قىلمىسكەرلەر جاساقتى اتىپ تاستاعان.
ءۇشىنشى قاشىپ كەتكەن قىلمىسكەر - نيكولاي پاۆليۋك ءالى دە ىزدەۋدە بولعان. قاشقاننان كەيىن ەر ادام بىردەن رەسەي اۋماعىنان شىعىپ كەتكەن.
ول ەستونيادا جالعان تولقۇجاتپەن ءومىر سۇرگەن. ال 2004-جىلى ەل ەۋروپالىق وداقتىڭ قۇرامىنا كىرگەن كەزدە ول گەرمانياداعى اناسىنا كەتىپ قالعان. وسى ۋاقىتقا دەيىن ونى ينتەرپول ىزدەپ، ال گەرمانيادا كولىك پوليتسياسى ۇستادى. ءبىر تاڭعالارلىعى، ولدەنبۋرگ قالاسىنان نەمىس پوليتسەيلەرى ۇستاعان قىلمىسكەر رەسەيگە بەرىلمەگەن، سەبەبى گەرمانيا زاڭدارى بويىنشا تۇرمەدەن قاشۋ قىلمىستىق جازا ەمەس ەكەن. ول ۇستالعاننان ءبىر كۇن وتكەن سوڭ بوساتىلعان.
ال 2010-جىلى پاۆليۋك ميحايل يۆانوۆيچ ۋتكيەۆيچتىڭ اتىنا قازاقستان ازاماتىنىڭ جالعان تولقۇجاتىن راسىمدەپ العان. وسى تولقۇجاتپەن ەر ادام ءبىراز ۋاقىت پەتروپاۆلدا تۇردى.
وسىدان كەيىن ۋتكيەۆيچ-پاۆليۋك ۇيلەنىپ، ۇلدى بولعان. بىرنەشە جىلدان كەيىن ەرلى-زايىپتى اجىراسىپ، قازاقستاندىق ايەلى پاۆليۋك-ۋتكيەۆيچتەن اليمەنت ءوندىرىپ الۋ ءۇشىن سوتقا جۇگىنگەن.
وسى ۋاقىتتا بەسكولدىك قىلمىسكەر گرۋزياعا كوشىپ، وندا بەس جىلعا جۋىق جاسىرىنىپ جۇرەدى. پاۆليۋك قاشقاننان 21 جىل وتكەن سوڭ، ف ق ق (ف س ب) قىزمەتكەرلەرى ونى انىقتاپ، گرۋزيا پوليتسياسى ەر ادامدى ۇستادى. قازىر ونى رەسەيگە ەكستراديتسيالاۋ ماسەلەسى شەشىلىپ جاتىر.
«زاڭ بويىنشا، نيكولاي پاۆليۋك 1995-جىلى سوت تاعايىنداعان مەرزىمگە قامالۋى كەرەك. سونداي-اق، وعان قاشقانى ءۇشىن، جالعان قۇجاتتار جاساعانى ءۇشىن جانە تاعى باسقاسى ءۇشىن جاڭا سوت وتىرىسى وتەدى»، - دەلىنگەن ماقالادا.
