ن. نازاربايەۆ 1991 - جىلى- اق رەسەي مەن ۋكراينانى جانجالدان ساقتانۋعا شاقىرعان

 استانا. قازاقپارات - 1991 - جىلى قازاقستان پرەزيدەنتى نۇرسۇلتان نازاربايەۆ رەسەي مەن ۋكراينانى ەكى ەل اراسىندا تۋىنداۋى مۇمكىن جانجالدان ساقتانۋعا شاقىرعان. ەلباسى نۇرسۇلتان نازاربايەۆقا قاتىستى مۇنداي دەرەك «حابار» ارناسىنداعى «نازاربايەۆپەن ەڭ باستىلار جايلى.. .» اتتى دەرەكتى سۇحباتتا ءمالىم بولدى.

 دەرەكتى سۇحبات بارىسىندا 1991 - جىلى جازىلعان قازاقستان پرەزيدەنتىنىڭ سۇحباتىنان ءۇزىندى كورسەتىلدى. وندا ن. نازاربايەۆتىڭ رەسەي مەن ۋكراينا اراسىنداعى جانجالدىڭ ورىن الۋى ىقتيمالدىعى جايىندا ايتىپ، باۋىرلاس ەلدەرگە بارىنشا اباي بولۋعا شاقىرعاندىعى كورسەتىلدى.

بۇل رەتتە قازاقستان پرەزيدەنتى اتالعان ەكى ەلدىڭ حالقى اراسىندا ەشقانداي كوزقاراس قاراما- قايشىلىعى جوق ەكەندىگىن باسا ايتىپ، تەك جاۋاپسىز ساياساتكەرلەر عانا جانجال وتىن تۇتاندىرۋى مۇمكىن ەكەندىگىن ەسكەرتەدى.

«1991 - جىل وتە قيىن كەزەڭ بولاتىن. بارلىعى قايدا بەت الارىن بىلمەيتىن، رەسپۋبليكالار اراسىندا تەكە- تىرەس بار بولاتىن. ەڭ ءبىرىنشى كەزەكتە ۋكراينا ءتىپتى، كونفەدەراتسيا يدەياسىن دا قولداماعان ەدى. ءبىز نوۆو- وگاريەۆودا باس قوسىپ، ماسەلەلەردى تالقىلاعان كەزىمىزدە ۋكراينا پرەزيدەنتى ءار ۋاقىتتا: «مەن كەتۋىم كەرەك، اقىلداسۋىم كەرەك»، دەيتىن. سوندىقتان، ەش شەشىم قابىلداي المادىق. رەسەي پرەزيدەنتى ەلتسين: «ەگەر ۋكراينا بولماسا، وندا ءبىز نە جايىندا ءسوز قوزعايمىز»،  دەيتىن. مىنە، وسىمەن ءبارى اياقتالاتىن. سوندىقتان، مەن مۇنىڭ سوڭى جانجالعا اپارىپ سوقپاۋى ءۇشىن ايتقان ەدىم. وكىنىشكە وراي، سوڭىندا سولاي بولدى دا»، - دەدى ن. نازاربايەۆ.

 اۆتور: مارلان جيەمباي