قازاقستاندا 194 مىڭ ادام ونكولوگيالىق اۋرۋلارمەن اۋىرادى

بۇل كورسەتكىش 2020 -جىلمەن سالىستىرعاندا 4 مىڭعا كوبىرەك، دەپ حابارلايدى قازاقپارات ءتىلشىسى.
«2021 -جىلدىڭ قورىتىندىسى بويىنشا، ونكولوگيالىق اۋرۋلارمەن سىرقاتتانۋ %9,8 عا ءوسىپ، 100 مىڭ تۇرعىنعا شاققاندا 190,3 تى قۇرادى. ياعني، 2021 -جىلى 36 مىڭنان استام جاڭا جاعداي انىقتالدى، بۇل 2020 -جىلمەن سالىستىرعاندا 4 مىڭعا ارتىق. مۇنى 2020 -جىلى Covid-19 جاعدايىنا بايلانىستى تۇرعىنداردىڭ ەمحاناعا بارا الماۋىمەن بايلانىستىرۋعا بولادى. 2021 -جىلى ەمحاناعا بارعان تۇرعىنداردىڭ سانى كوپ، سكرينينگتەن وتكەن تۇرعىندار سانى كوپ»، - دەدى قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ باسشىسى، ق ر دەنساۋلىق ساقتاۋ مينيسترلىگىنىڭ شتاتتان تىس باس ونكولوگى ديليارا قايداروۆا ورتالىق كوممۋنيكاتسيالار قىزمەتىندە وتكەن باسپا ءسوز كونفەرەنسياسىندا.
ونىڭ ايتۋىنشا، قازاقستاندا 194 مىڭ ناۋقاس ەسەپتە تۇر. ق ر د س م مەديتسينالىق كومەكتى ۇيىمداستىرۋ دەپارتامەنتى ديرەكتورىنىڭ ورىنباسارى گۇلنار جانعاراشيەۆانىڭ ايتۋىنشا، ونكولوگيالىق اۋرۋلارمەن اۋىراتىنداردىڭ نەگىزگى ۇلەسىن (%59) ەڭبەككە قابىلەتتى جاستاعى ادامدار قۇرايدى.
«ونكولوگيالىق اۋرۋلاردى ەرتە انىقتاۋ %27 عا دەيىن ءوستى. اۋرۋ بويىنشا ءبىرىنشى ورىندا ءسۇت بەزى وبىرى، ەكىنشى ورىندا - وكپە وبىرى، ءۇشىنشى ورىندا - كولورەكتالدى قاتەرلى ىسىك، ءتورتىنشى ورىندا - اسقازان وبىرى، بەسىنشى ورىندا - جاتىر موينى وبىرى تۇر. بىزدە ءولىم- ءجىتىم %4,7 عا تومەندەدى جانە بيىل 13665 جاعدايدى قۇرادى. ءولىم-ءجىتىم قۇرىلىمىندا ءبىرىنشى ورىندا وكپە وبىرى، ەكىنشى ورىندا - اسقازان وبىرى، ءۇشىنشى ورىندا - كولورەكتالدى قاتەرلى ىسىك، ءتورتىنشى ورىندا - ءسۇت بەزى وبىرى تۇر»، - دەپ تولىقتىردى د. قايداروۆا.
سپيكەر قازاقستاندا ونكولوگيالىق ناۋقاستار ءۇشىن ەمدەۋ تەگىن ەكەنىن ەسكە سالدى. وعان حيرۋرگيالىق ەمدەۋ، ساۋلەلىك تەراپيا، حيميوتەراپيا، ماقساتتى تەراپيا، يممۋنوتەراپيا كىرەدى. جىل سايىن ناۋقاستاردى ەمدەۋگە 66 ميلليارد تەڭگەدەن استام قاراجات قاجەت.
اۆتور: ايجان سەرىكجان قىزى