داۋلەت تۇرلىحانوۆتىڭ جۇلدەسى ءۇشىن ەلىمىزدىڭ تۇكپىر- تۇكپىرىنەن 194 بالۋان الماتىعا جينالدى

None
None
الماتى. قازاقپارات - بۇگىن الماتىدا «دوستىق» سپورت كەشەنىندە ك س ر و ەڭبەك سىڭىرگەن سپورت شەبەرى، قازاقستان رەسپۋبليكاسىنا ەڭبەك سىڭىرگەن جاتتىقتىرۋشى، 1988 -جىلعى سەۋل وليمپياداسىنىڭ كۇمىس جۇلدەگەرى، اتاقتى بالۋان داۋلەت تۇرلىحانوۆتىڭ جۇلدەسى ءۇشىن گرەك-ريم كۇرەسىنەن جاسوسپىرىمدەر اراسىندا 16- اشىق رەسپۋبليكالىق تۋرنير باستالدى. وعان ەلىمىزدىڭ تۇكپىر- تۇكپىرىنەن 194 بالۋان قاتىسۋدا.

«تۋرنير 1998-2000 - جىلدار ارالىعىندا تۋعان جاسوسپىرىمدەر اراسىندا ءوتىپ جاتىر. بالۋاندار ادەتتەگىدەي 10 سالماق دارەجەسىندە جەكەلەي جانە كوماندالىق ەسەپتە باق سىناسادى. ءار كوماندادا 10 سپورتشىدان بار. جالپى بيىلعى تۋرنيرگە 22 كوماندا قاتىسۋدا. جەڭىمپازدارعا باعالى سىيلىقتار تابىس ەتىلەدى»، - دەدى بۇگىنگى ءتۋرنيردىڭ باس تورەشىسى، حالىقارالىق دارەجەدەگى تورەشى، ەركىن كۇرەس بويىنشا باپكەر تاعىبەرگەن سەيىتوۆ.

سونىمەن قاتار، ول وسى ءتۋرنيردىڭ جەڭىمپازدارى ۇلتتىق قۇراما ساپىنا ىرىكتەلىپ الىنىپ، تاياۋدا رەسەيدىڭ دونداعى روستوۆ قالاسىندا جاسوسپىرىمدەر اراسىندا وتەتىن حالىقارالىق تۋرنيرگە باراتىندىعىن ايتتى.

ال بۇگىنگى تۋرنير اياسىندا بالۋاندار بەس سالماق دارەجەسى بويىنشا كۇش سىناسۋدا. قالعان بەس سالماق دارەجەسى بويىنشا سايىستار ەرتەڭ - ءتۋرنيردىڭ سوڭعى كۇنى وتەدى.

ەستەرىڭىزگە سالا كەتەلىك، داۋلەت تۇرلىحانوۆ - الەم چەمپيونى (1989 ج.)، الەم چەمپيوناتىنىڭ كۇمىس جۇلدەگەرى (1993 ج. )، ەۋروپا چەمپيونى (1987 ج. )، ازيا چەمپيونى (1995 ج. )، وليمپيادا ويىندارىنىڭ كۇمىس (1988 ج. ) جانە قولا (1992 ج. ) جۇلدەگەرى، ك س ر و- نىڭ جەتى دۇركىن چەمپيونى، الەم كۋبوگىنىڭ ەكى دۇركىن يەگەرى، ك س ر و حالىقتار سپارتاكياداسىنىڭ جەڭىمپازى (1991 ج. ) ، ХІІ ازيا ويىندارىنىڭ جەڭىمپازى (1994 ج. ). پەداگوگيكا عىلىمدارىنىڭ كانديداتى. قازاقستان كۇرەس فەدەراتسياسىنىڭ قۇرمەتتى پرەزيدەنتى جانە فيلا بيۋروسىنىڭ مۇشەسى.

اۆتور: جاپپاربەرگەن ايبوتا

سوڭعى جاڭالىقتار